सरकारले यूरो ६ मापदण्ड सरहको नेपाल सवारी साधन प्रदूषण मापदण्ड २०८२ जारी गरेसँगै राष्ट्र बैंकले पनि सो व्यवस्था कार्यान्वयन गराउन सवारी आयातमा कडाई गरेको छ । केन्द्रीय बैंकले बैंक तथा वित्तीय संस्थाहरुका लागि एकिकृत परिपत्र जारी गर्दै नेपाल सवारी साधन प्रदूषण मापदण्ड २०८२ बाहेकका गाडीको आयातमा प्रतितपत्र (एलसी) खोल्न बन्देज लगाएको हो ।
नेपाल राष्ट्र बैंकको विदेशी विनिमय व्यवस्थापन विभागबाट जारी गरेको परिपत्र अनुसार अब नेपाल सवारी साधन प्रदूषण मापदण्ड २०८२ विपरितका सवारी साधनहरु आयात गर्न बैंक तथा वित्तीय संस्थाले एलसी खोल्न पाउने छैनन् ।
सरकारले गत असार ९ गते राजपत्रमा सूचना प्रकाशित गरेर साउन १ बाट यूरो ६ सरहको सवारी साधन प्रदूषण मापदण्ड २०८२ कार्यान्वयनमा ल्याएको हो । जस अनुसार अब नेपालमा दुई पाङ्ग्रे, तीन पाङ्ग्रे र चार पाङ्ग्रे लघु सवारी साधनमा युरो ५ सरहको मापदण्ड लागू गरिएको छ । चार पाङ्ग्रे सवारी साधनमा युरो ६ मापदण्ड लागू गरिएको छ ।
