नाडा अटोमोबाइल्स एसोसियशन अफ नेपालले भदौ ३ गतेदेखि ८ गतेसम्म ‘नाडा अटो शो २०२५’ आयोजना गर्दैछ । हरेक वर्ष चाडवाडको सुरुवात हुने समयमा आयोजना हुने नाडा अटो शो यसपाली पनि भृकुटीमण्डप प्रदर्शनी स्थलमा आयोजना हुँदैछ।
शोको उद्घाटन उपप्रधानमन्त्री एवं अर्थमन्त्री विष्णु प्रसाद पौडेलले गर्नेछन् ।
यो केवल प्रदर्शनी मात्र नभई, नेपालको दिगो, स्मार्ट र भविष्यमुखी मोबिलिटीको प्रतिबिम्ब भएको नाडाले जनाएको छ । “Go For More” भन्ने नारासहित आयोजना हुने यस वर्षको शोले नवीनतम् प्रविधि, ग्राहक र अटो क्षेत्रका सबै सरोकारवालालाई एकै छानामुनि ल्याउनेछ ।
नाडा अटो शो २०२५ मा चारपांग्रे रोबोटहरू र उड्ने कार विशेष आकर्षणका रुपमा रहने छन् । स्वचालन र बुद्धिमत्ताको नयाँ युगको प्रतीकस्वरूप उन्नत चार पाङ्ग्रे रोबोटहरू ‘UNITREE’ रहने छन् ।
भविष्यको शहरी हवाई मोबिलिटीको पहिलो झलकका रुपमा ‘Deepal eVTOL UAV (उड्ने कार) पनि झन विशेष आषर्कण रहने छ ।
१९ वटा चारपांग्रे ब्रान्डहरू, १३ वटा हल्का व्यावसायिक सवारी साधन ब्रान्डहरू, ४ वटा दुईपांग्रे सवारी ब्रान्डहरू, ३५ कम्पनीहरू (ल्युब्रिकेन्ट, टायर, ब्याट्री, ग्यारेज उपकरण र वित्तीय संस्थाहरू)सहित १२५ भन्दा बढी स्टलहरु रहने छन् ।
१ लाखभन्दा बढी आगन्तुकले भ्रमण गर्ने अपेक्षा गरिएको यस १ लाख ६२ हजार ५ सय वर्गफुट प्रदर्शनी क्षेत्रसहित नेपालकै अहिलेसम्मकै सबैभन्दा ठूलो अटो शो हुने नाडाले जनाएको छ ।
