नेपालमा दीपल ईभीको आधिकारकि बिक्रेता एमएडब्लू वृद्धि अटोकर्पले एस–०७ आईसीए सार्वजनिक गरेको छ । कम्पनीले दीपल एस–०७ लाई एलएफपी ब्याट्रीमा उपलब्ध गराएको हो । दीपलका ब्राण्ड एम्बासडर क्रिकेट संघका सचिव पारस खड्काले उक्त ईभी लन्च गरेका हुन् ।
यसअघि एनसीएम ब्याट्रीमा उपलब्ध रहेको एस–०७ एलएफपी ब्याट्री प्याकमा पनि नेपाल आएको हो । ६८.८ किलोवाट आवरको ब्याट्री प्याकमा आएको यस ईभीले सिंगल चार्जमा ४१० किलोमिटर रेन्ज दिने दाबी गरिएको छ ।
५ वर्षसम्म ‘जीरो ओनरशिप कस्ट’ स्किम
एस–०७ आईसीए सार्वजनिक गर्दै एमएडब्लू वृद्धि अटोकर्पले ५ वर्षसम्म ‘जीरो ओनरशिप कस्ट’ स्किम पनि ल्याएको छ । यस अफर अन्तर्गत उपभोक्ताले गाडी किनेको ५ वर्षसम्म कुनै खर्च गर्नुपर्ने छैन ।
अर्थात्, कम्पनीले नै यसमा ५ वर्षको अटोप्लस बीमा, ५ वर्षको सवारी साधनको वार्षिक कर, निःशुल्क सर्भिसिङ, निःशुल्क मेन्टिनेन्स गरिदिनेछ । यतिसम्म की, ५ वर्षसम्म चार्ज गर्दा लाग्ने विद्युत महशुल पनि कम्पनीले नै तिरिदिने छ ।
एन्डभान्स्ड सेफ्टी फिचर्सले भरिपूर्ण एस–०७ आईसीएको नेपाली बजारमा सुरुवाती मूल्य ७४.९९ लाख तोकिएको छ ।
