आर्थिक वर्ष २०८१/०८२ मा झण्डै ३२ अर्ब रुपैयाँ बराबरका विद्युतीय जीप, कार र भ्यान आयात भएका छन् । भन्सार विभागले सार्वजनिक गरेको तथ्यांक अनुसार आर्थिक वर्ष २०८१/०८२ मा १३ हजार ५६९ युनिट ईभी कार तथा जीप आयात भएका हुन् ।
३१ अर्ब ७५ करोड ३६ लाख ३३ हजार बराबरका १३ हजार ५६९ युनिट ईभी जीप, कार तथा भ्यान आयात हुँदा सरकारले १९ अर्ब ७० करोड २६ लाख १३ हजार बराबर राजस्व पाएको छ ।
कुल आयात भएका ईभी कारमध्ये चीनबाट धेरै आएका छन् । चीनबाट ५० किलोवाट सम्मका २ हजार ८३२ युनिट, ५१ देखि १०० किलोवाट सम्मका ६ हजार ९२ युनिट, १०१ देखि २०० किलोवाट सम्मका १ हजार २४९ युनिट र २०१ देखि ३०० किलोवाट सम्मका ३२ युनिट ईभी आयात भएका छन् । ३०० किलोवाट माथिका २ युनिट ईभी आयात हुँदा यी सबै चीनबाट आएका छन् ।
यस्तै, नेपालमा आयात हुने ईभीमा भारतीय ईभीको हिस्सा दोस्रो स्थानमा छ । भारतबाट ५० किलोवाट सम्मका १ हजार ८९६ युनिट, ५१ देखि १०० किलोवाट सम्मका १ हजार ३३८ युनिट र १०१ देखि २०० किलोवाट सम्मका १२ युनिट ईभी आयात भएका छन् ।
इन्डोनेशियाबाट ५० किलोवाट सम्मका ४ युनिट ईभी आयात भएका छन् ।
यसैगरी, जर्मनीबाट १०१ देखि २०० किलोवाट सम्मका ३६ युनिट र २०१ देखि ३०० किलोवाट सम्मका ९ युनिट ईभी कार नेपाल भित्रिएका छन् ।
मलेसियाबाट १०१ देखि २०० किलोवाट सम्मका ५० युनिट ईभी नेपाल आउँदा यहीँ क्षमताका अमेरिकाबाट १० युनिट र कोरियाबाट ५ युनिट ईभी आएका छन् । अमेरिकाबाट २०१ देखि ३०० किलोवाट सम्मको एउटा ईभी आउँदा ५१ देखि १०० किलोवाट सम्मको एउटा ईभी कोरियाबाट पनि आएको छ ।
