साउन २१ देखि २५ गतेसम्म ‘नेपाल अटोमोबाइल इम्पोर्टर्स एन्ड मेनुफ्याक्चरर्स एसोसिएसन’ (नाइमा)ले ‘नाइमा मोबिलिटी एक्स्पो’ आयोजना गर्दैछ । जसमा नेपाली बजारमा ईभीको व्यवसायिक बिक्री वितरण गर्ने सरुवाती गर्ने कम्पनी पारामाउण्ट मोटर्सले २ वटा स्टल राख्दैछ ।
एमजी र माज्दाका दुइ स्टल राख्न लागेको पारामाउण्टले एक्स्पो लक्षित केही नयाँ मोडल पनि ल्याउँदैछ । दुइ वटा स्टलमध्ये एमजी ब्राण्डका धेरै मोडल प्रस्तुत गर्न तुलनात्मक रुपमा ठूलो स्टल बनाइने छ ।
IM6
प्रीमियम एसयूभी ब्राण्ड ‘IM6’ नाइमा एक्स्पोमा लञ्च हुँदैछ । पारामाउण्ट मोटर्सका जनरल म्यानेजर सुनिल क्षेत्रीका अनुसार ‘IM by MG’ भनिने ‘आईएम ६’ ईभी आधुनिक फिचर्स, गजबको लुक्स र डिजाइनका साथै लक्जरीयस मोडल हो ।
आईएम ६ एमजीकै शोरुमबाट बिक्री वितरण हुनेछ । यो एसयूभीका अहिले केही युनिट नेपाल आइसकेको छ । नाइमा एक्स्पोमा औपचारिक रुपमा सार्वजनिक गरेर बिक्री वितरण सुरु गर्ने तयारीमा कम्पनी छ । यसको मूल्य लगायतका कुरा भने लञ्चकै दिन सार्वजनिक हुनेछ ।
MG Windsor
नेपालमा असार १८ गते लञ्च भएको MG Windsor EV पनि पनि पारामाउण्ट मोटर्सले नाइमा एक्स्पोमा राख्दैछ । नेपालका लागि एमजीको आधिकारिक वितरक पारामाउण्ट मोटर्सले भारतमा उत्पादन भएको वीन्डसर ईभीलाई जुलाई २ मा लञ्च गरेसँगै यसको बुकिङ र बिक्री सुरु भइसकको छ ।
MG Windsor हाल दुई भेरियन्टमा नेपाल आएको छ । ३८ किलोवाट आवरको एलएफपी ब्याट्री प्याक भएको एमजी वीन्डसरमा १ सय किलोवाट क्षमताको मोटर जडान गरिएको छ । यसले एक पटकको फूल चार्जमा ३३१ किलोमिटर रेन्ज प्रदान गर्ने बताइएको छ ।
वायरलेस चार्जर, ३६० डिग्री क्यामेरा, अटोमेटिक एसी, ६ वटा एयरब्याग, टायर प्रेसर मोनिटरिङ सिस्टम जस्ता विशेषता छन् । पानारोमिक ग्लास रुफ, फ्लस डोर ह्याण्डल, इन्टेरियरमा ८.८ इन्चको फूल एलसीडी इन्ट्रुमेन्टल प्यानल र १५.६ इन्चको फ्लोटिङ सेन्टर कन्ट्रोल स्क्रीन र सबै एलईडी लाइट दिइएको छ ।
भारतमा उत्पादनको ६ महिनामा २० हजार बढी युनिट बिक्री भएको एमजी वीन्डसरको मूल्य नेपाली बजारमा ३७ लाख ९९ हजारदेखि सुरु छ । अर्को भेरियन्टको मूल्य ३९ लाख ९९ हजार छ ।
एमजी एस–५
पारामाउन्ट मोटर्ससँग गत मार्चमा नेपाली बजाजरमा सार्वजनिक भएको एमजी एस–५ ईभी पनि छ । कम्पनीले एस–५ लाई दुई ब्याट्री अप्सन र तीन भेरियन्टमा लञ्च गरेको थियो ।
एस–५ मा ४९ र ६२ किलोवाट आवर क्षमताका दुई ब्याट्री अप्सन पाउन सकिन्छ । नेपाल आएको ६२ किलोवाट आवरको ब्याट्री भएको एस–५को मूल्य ५४ लाख ९९ हजार रुपैयाँ तय गरिएको छ ।
४९ किलोवाट आवरको ब्याट्री भएको मोडल दुई भेरियन्टमा उपलब्ध छ । जसमध्ये इन्ट्री भेरियन्टको मूल्य ४३ लाख ९९ हजार रुपैयाँ तोकिएको छ । यसको फुल अप्सन भेरियन्टको मूल्य ४९ लाख ९९ हजार रुपैयाँ तोकिएको छ ।
एमजी एस–५ मा प्रयोग भएको ४९ किलोवाटको ब्याट्रीले ३४० र ६२ किलोवाट आवरको ब्याट्रीले ४३० किलोमिटर रेन्ज दिने छ । यसको सबै भेरियन्टमा ९९ किलोवाट क्षमताको इलेक्ट्रीक मोटर छ ।
एस–५मा रहेको सानो ब्याट्रीलाई डिसी चार्जरले २६ मिनेटमै ३० देखि ८० प्रतिशतसम्म चार्ज गर्न सकिनेछ । डिसी चार्जरबाट ठूलो ब्याट्री २१ मिनेटमै ८० प्रतिशतसम्म चार्ज हुने बताइएको छ । एस–५ रहेको एलएफपी ब्याट्री अहिलेसम्मकै सबैभन्दा पातलो रहेको कम्पनीको दाबी छ ।
ड्यासबोर्डमा १२.८ इन्चको इन्फोटेन्टमेन्ट सिस्टम, १०.२५ इन्चको ड्राइभर इन्फर्मेसन डिस्प्ले रहेको यस गाडीको ग्राउण्ड क्लियरेन्स १८० एमएम छ ।
कोमेटको नयाँ भर्सन
पारामाउण्टको एमजी कोमेट ईभी पनि हालै मात्रै नेपाली बजारमा नयाँ भर्सनमा आएको छ । फूल चार्जमा २३० किलोमिटर रेन्ज दिने यस ईभीमा १७.३ किलोवाट आवर क्षमताको ब्याट्री छ । यो गाडी ३.५ घण्टामा फूल चार्ज हुने कम्पनीले जनाएको छ । यसले ७.४ किलोवाटको फास्ट चार्जर सर्पोट गर्ने बताइएको छ ।
चालक सिटबाहेक ४ सिटे फेमिली कार कोमेटको मूल्य १९ लाख ९९ हजारदेखि २२ लाख ७९ हजारसम्म छ । शहर तथा बजार एरियाभित्र चलाउन निकै किफायती र स्तरीय मानिने कोमेट ईभी नेपाली बजारमा निकै रुचाइएको मोडलमा पर्छ ।
कोमेटको नयाँ भर्सनलाई ‘फ्यूचर अफ अर्बन मोबिलिटी’ भनिएको छ । साथै, यसलाई ‘द स्ट्रिट स्मार्ट कार’ पनि भनिएको छ । अहिले नेपाली सडकमा ५ सय युनिटभन्दा बढी एमजी कोमेट ईभी गुडिरहेका छन् ।
एमजी–४
नेपाली सडकमा निकै गुडिरहेको मोडल हो एमजी ४ । अझै पनि यसका प्रयोगकर्ता बढिरहेका छन् ।
न्युजिल्याण्डको प्रख्यात सञ्चार कम्पनी स्टफद्वारा आयोजित ‘टप कार्स २०२४’ को उपाधि जितेको एमजी ४ ले नेपाल आउँदा ताका नै ‘युके कार अफ द इयर’ अवार्ड पनि पाएको थियो ।
सेफ्टी रेटिङमा ५ स्टार पाएको यस मोडल अझै पनि माग हुने मोडलमा पर्छ । एमजी ४ले सिङ्गल चार्जमा ४३५ किलोमिटरसम्मको रेञ्ज दिने बताइन्छ ।
Mazda CX 60
पारामाउण्टले Mazda तर्फ ‘CX60’ नेपाली बजारमा ल्याउने तयारी गरिरहेको छ । २०७८ साल बैशाखमा माज्दाको CX5 ल्याएर बिक्री सुरु गरेको पारामाउण्टले नाइमा एक्स्पोका लागि CX 60 मोडल ल्याउने तयारी गरिरहेको जनाएको छ ।
पारामाउण्टले सकेसम्म नाइमा एक्स्पोमा CX 60 लञ्च गर्ने लक्ष्यका साथ अहिले तयारीलाई तीव्रता दिइरहेको छ । कम्पनीले २०७८ असारमै ‘सिएक्स–९’ पनि ल्याएको थियो ।
माज्दा निकै लक्जरी र प्रीमियम ब्राण्ड हो ।
