उद्योगी व्यवसायीहरुले मूल्य अभिवृद्धि कर (भ्याट)मा बहुदर प्रणाली लगाउन माग गर्दै आइरहेका बेला पूर्वअर्थमन्त्री डा. युवराज खतिवडाले भने यसो नगर्न सुझाव दिएका छन् । निजी क्षेत्रले हाल १३ प्रतिशत रहेको भ्याटको दर क्रमशः घटाउँदै र वस्तु अनुसार फरक फरक दर लगाउन माग गर्दै आएपनि पूर्व अर्थमन्त्री खतिवडाले भने अर्थमन्त्री डा. स्वर्णिम वाग्लेलाई यसो नगर्न सुझाव दिएका हुन् ।
अर्थमन्त्री डा. वाग्लेले पूर्व अर्थमन्त्रीहरुसँग बजेट निर्माणका सन्दर्भमा सुझाव लिन छलफलको आयोजना गरेका थिए । त्यस क्रममा खतिवडाले ‘मूल्य अभिवृद्धि कर दुई दरमा नजानुहोला’ भन्ने सुझाव दिएको अर्थमन्त्री डा. वाग्लेको सचिवालयले जनाएको छ ।
बरु उनले अन्तःशुल्क जबर्जस्ती लगाउने गरिएको भन्दै यसलाई कम गर्दै जान सुझाव दिएका छन् । साथै, आयकरको सीमाको तल्लो स्ल्याब नचलाउन पनि खतिवडाको सुझाव छ ।
