सिटिजन्स ईन्टरनेशनल बैंकका ग्राहकले भारतको मेदान्ता द मेडिसिटी अस्पतालमा उपचार गराउँदा छुट पाउने भएका छन् । बैंक र उक्त हस्पिटलबीच बैंकका ग्राहकलाई छुट सुविधा उपलब्ध गराउने सम्बन्धि सम्झौता भएसँगै सिटिजन्स बैंकका ग्राहकले १५ प्रतिशतसम्म छुट पाउने भएका हुन् । यो छुट सुविधा मेदान्ता द मेडिसिटीका ७ अस्पतालमा प्राप्त हुनेछ ।
यसअघि छुट सुविधा मेदान्ता गुडगावँमा मात्रै लागू हुँदै आएकोमा अब थप ६ अस्पतालहरू– मेदान्ता नोएडा, मेदान्ता सुपर स्पेशलिटी अस्पताल, लखनउ, जय प्रभा मेदान्ता सुपर स्पेशलिटी अस्पताल, पटना, मेदान्ता सुपर स्पेशलिटी अस्पताल, इन्दौर, मेदान्ता अब्दुर रज्जाक अन्सारी मेमोरियल वीभर्स अस्पताल, राँची, मेदान्ता अस्पताल, राँचीमा पनि उपलब्ध हुनेछ ।
समझदारीपत्रमा बैंकतर्फबाट प्रमुख कार्यकारी अधिकृत गणेश राज पोखरेलले हस्ताक्षर गरेका छन् । बैंकका अनुसार यस सहकार्यबाट भारतमा स्वास्थ्य उपचार गराउन जाने क्रममा नेपालीहरुले विगतदेखि नै लाभ लिइरहेकोमा अब थप हस्पिटलबाट समेत छुट सुविधा उपलब्ध हुने भएपछि नेपालीहरु थप लाभान्वित हुने छन् ।
सिटिजन्स बैंक इन्टरनेसनलले हाल ६१ जिल्लामा फैलिएका २०० शाखा, १६९ एटीएम, ३ विस्तारित काउन्टर र ४२ शाखारहित बैंकिङ इकाइमार्फत सेवा प्रदान गरिसकेका छन्।
