नेपाल राष्ट्र बैंकले ‘स्वाप कारोबार विनियमावली, २०८१’ जारी गरेको छ। नेपाल राष्ट्र बैंकको २०८१ साउन ४ गतेको बैठकले विनियमावली स्वीकृत गरेको हो ।
बैंक तथा वित्तीय संस्थाले विदेशबाट भित्र्याएको विदेशी मुद्राको ऋणमा रहनेविदेशी विनिमय जोखिम न्यूनीकरण तथा व्यवस्थापन गर्न विदेशी विनिमय (नियमित गर्ने) ऐन, २०१९ को दफा १२ ले दिएको अधिकार प्रयोग गरी राष्ट्र बैंकको सञ्चालक समितिले विनियमहरु बनाएको राष्ट्र बैंकले उल्लेख गरेको छ।
स्वाप कारोबार भनेको ‘बैंक तथा वित्तीय संस्थाले विदेशबाट भित्र्याएको भारतीय रुपैयाँ बाहेकको विदेशी मुद्रामा उल्लेख भएको ऋणको विदेशी विनिमय जोखिम व्यवस्थापन गर्ने डेरिभेटिभ उपकरणको कारोबार हो । यस्ता कारोबारमा पहिलो र दोस्रो चरणका कारोबार मिति, रकम र विदेशी विनिमय दर लगायतका विषय स्वाप कारोबारको बोलकबोल मितिमा नै तय गर्ने र तोकिए बमोजिम राफसाफ गर्नु पर्ने व्यवस्था छ। स्वाप कारोबार अमेरिकी डलर/नेपाली रुपैयाँ (USD/NPR Pair) मा हुनेछ ।
विनियमावलीले अनुसार राष्ट्र बैंकले स्वाप कारोबार समिति गठन गर्ने छ। समितिको अध्यक्षमा विदेशी विनिमय व्यवस्थापन विभाग हेर्ने डेपुटी गभर्नर रहने छन् । त्यस्तै समितिको सदस्यहरुमा विदेशी विनिमय व्यवस्थापन विभागको कार्यकारी निर्देशक, मौद्रिक व्यवस्थापन विभागको कार्यकारी निर्देशक , आर्थिक अनुसन्धान विभागको कार्यकारी निर्देशक, बैंकिङ्ग विभागको कार्यकारी निर्देशक, र वित्त व्यवस्थापन विभागको कार्यकारी निर्देशक रहने छन् । विदेशी विनिमय व्यवस्थापन विभागको निर्देशक (लगानी हेर्ने) सदस्य समितिको सचिव रहने छन् ।
