बैंक तथा वित्तीय संस्था परिसंघ नेपाल (सिबिफिन)को अध्यक्षमा प्रचण्डबहादुर श्रेष्ठ चयन भएका छन् । हिमालयन बैंकका अध्यक्ष रहेका श्रेष्ठलाई सिबिफिन कार्यसमिति बैठकले सर्वसम्मत रूपमा अध्यक्ष चयन गरेको हो ।
यसअघि अध्यक्ष उपेन्द्र पौडेलको नबिल बैंकमा अध्यक्षको कार्यकाल सकिएपछि उनी स्वतः सिबिफिनको अध्यक्ष पदबाट पनि बाहिरिएका थिए । अध्यक्ष पद रिक्त भएपछि कार्यसमिति बैठकले श्रेष्ठलाई अध्यक्ष चयन गरेको हो । उनी यसअघि सिबिफिनमा महासचिव थिए ।
यस्तै, महासचिव श्रेष्ठ अध्यक्षमा चयन भएपछि रिक्त उक्त पदमा एनएमबि बैंकका अध्यक्ष मनोज गोयल चुनिएका छन् । कार्यसमिति सदस्य रहेका गोयल महासचिव बनेका हुन् ।
यसैगरी, संस्थाले लक्ष्मी सनराइज बैंकका अध्यक्ष रमण नेपाललाई कोषाध्यक्षमा चयन गरेको छ । यसअघि कोषाध्यक्ष रहेका एनआईसी एसिया बैंकका अध्यक्ष तुलसीराम अग्रवालले राजीनामा दिएपछि उक्त पद पनि रिक्त थियो ।
सिबिफिनको विधानमा अध्यक्ष, महासचिव र कोषाध्यक्ष बैंक सञ्चालक समितिको बहालवाला अध्यक्ष हुनुपर्ने प्रावधान छ ।
नयाँ अध्यक्ष, महासचिव र कोषाध्यक्षसहित सिबिफिनमा अहिले वरिष्ठ उपाध्यक्षमा राजेश उपाध्यय, उपाध्यक्षमा कुशप्रसाद मल्ली, सचिवमा थानेश्वर पौडेल, सह–कोषाध्यक्षमा दिलीप मुनकर्मी र सदस्यहरुमा राधेश पन्त, बालगोपाल वैद्य, राजाराम खड्का, किशोरकुमार कार्की र टुकप्रसाद पौडेल रहेका छन् ।
