ऋण उठाउन जाँदा धम्की र गालीगलौज हुन थालेपछि सहकारी अभियन्ताहरुले गृहमन्त्रीलाई गुहारेका छन् । सहकारी संस्थाहरुले प्रवाह गरेको कर्जा उठाउन जाँदा र सम्बन्धित ऋणीको धितो लिलामी गर्दा धम्की आउन थालेपछि सहकारी महासंघ र सहकारी बैङ्कका प्रतिनिधिले गृहमन्त्री रबी लामिछानेसँग सुरक्षाको माग गरेका हुन् ।
सहकारी महासंघकी अध्यक्ष ओमदेवी मल्लले सहकारी संस्थाबाट ऋण लगेकाहरुसँग ऋण असुली गर्न जाँदा र सम्बन्धित ऋणीको धितो लिलाम प्रकृयामा विभिन्न समूहले अवरोध पुर्याएको भन्दै आवश्यक सुरक्षा व्यवस्थाको माग गरेकी छिन् । सहकारीबाट लिएको ऋण तिर्नुपर्दैन भन्दै केही अराजक समूहबाट भ्रम फैलाइएको, ऋण असुलीमा जाने कर्मचारीमाथि धम्की आउने गरेको, गालीगलौज गर्ने गरिएको र धितो लिलामी प्रकृयामा अवरोध हुने गरेको अध्यक्ष मल्लको भनाइ छ ।
सहकारीका विषय सरकारले गम्भीरताका साथ हेरिरहेको भन्दै उपप्रधानमन्त्री तथा गृहमन्त्री लामिछानेले अवाञ्छित गतिविधिमा संलग्न जोसुकै भए पनि कारबाहीको दायरामा ल्याइने बताएका छन् । उनले ऋण अशुली र धितो लिलाममा भइरहेको अवरोध हटाउन गृह मन्त्रालयले आवश्यक अध्ययन गरेर परिपत्र गर्ने आश्वासनसमेत दिएका छन् ।
