राष्ट्रिय सहकारी महासंघले नेपालमै पहिलो पटक ‘सहकारी रोजगार मेला’ सञ्चालन गर्ने भएको छ । महासंघले बुधबार पत्रकार सम्मेलन गर्दै असार ७ गतेदेखि ९ गतेसम्म मेला सञ्चालन हुने र मेलाको सम्पूर्ण तयारी पुरा भइसकेको जनाएको छ ।
‘मर्यादित सहकारी व्यवसायका लागि युवा संलग्नता’ भन्ने नाराका साथ सञ्चालन हुने रोजगार मेलाले रोजगारदाता र रोजगारीको खोजीमा रहेका युवाहरुलाई जोड्ने सहकारी महासंघकी अध्यक्ष ओम देवी मल्लले बताएकी छन् । मेलामा युवा तथा विद्यार्थीहरूलाई सहकारी क्षेत्रमा रोजगारीको अवसरबारे जानकारी गराइने र आवश्यक जनशक्ति खोजिरहेका सहकारीहरूलाई पनि मेलाले दक्ष जनशक्ति उपलब्ध गराउने विश्वास लिइएको उनको भनाइ छ ।
मेलामा ३५ स्टलहरू रहने छन् । अवलोकनकर्ता तथा रोजगारी खोजीमा रहेकाहरूका लागि क्युआर स्क्यानमार्फत दर्ता गर्ने व्यवस्था गरिएको छ । मेलामा निःशुल्क प्रवेश गर्न सकिने छ ।
