प्रतिकूल मौसमका कारण त्रिभुवन अन्तर्राष्ट्रिय विमानस्थलबाट हुने आन्तरिक हवाई उडान प्रभावित भएका छन् ।
मौसममा आएको खराबीका कारण काठमाडौँ अन्तर्राष्ट्रिय विमानस्थलमा भिजुअल फ्लाइट रुल्स (भीएफआर) उडान भइरहे पनि काठमाडौँबाहिरका विराटनगर, सिमरालगायत गन्तव्यका उडान प्रभावित भएको त्रिभुवन अन्तर्राष्ट्रिय विमानस्थलले जानकारी दिएको हो ।
‘इनरुट वेदर’ बिग्रिएकाले दुई विमान ‘डाइभर्ट’ भएका छन् । काठमाडौँबाट सिमरा उडेको यती एयरलाइन्सको विमान सिमराको अकाशमा पुगेर अवतरण गर्न नसक्दा काठमाडौँ फकिर्एको छ । यतीकै अर्को जहाज काठमाडौँबाट विराटनगर उडेकोमा मौसम बिग्रिएपछि बीच बाटोबाटै काठमाडौँ फर्किएको छ ।
मौसम बिग्रिएकाले आजका लागि कुनै पनि पर्वतीय उडान भएको छैन । अन्तर्राष्ट्रिय उडान भने सामान्य रुपमा सञ्चालन भइरहेको छ ।
