उद्योगपति पवन गोल्यानले किसान र सर्वसाधारणलाई आफ्नो बाँझो जमिनमा अम्बा खेती गर्न आह्वान गर्दै आफूले किनिदिने घोषणा गरेका छन् । खाली वा प्रयोगविहीन जग्गामा व्यावसायिक अम्बा खेती गर्न आह्वान गर्दै उनले यो दीर्घकालीन आम्दानीको स्रोतमा रूपान्तरण हुने विश्वास दिलाएका छन् ।
उद्योगी गोल्यानले माटो नेपालमार्फत बिरुवादेखि बगैंचा स्थापना, प्राविधिक सहयोग र उत्पादनको बजार सुनिश्चित गर्ने सम्मको प्रतिवद्धता जनाएका छन् । उच्च गुणस्तरीय अम्बाका बिरुवा उपलब्ध गराउने, वैज्ञानिक विधिबाट बगैंचा स्थापना तथा ड्रिप सिँचाइसम्बन्धी प्राविधिक सहयोग गर्ने, रोपाइँदेखि उत्पादनसम्म निरन्तर प्राविधिक परामर्श तथा तालिम दिने र उत्पादनको शत् प्रतिशत खरिद सुनिश्चितता गर्ने उनको प्रतिवद्धता छ ।
गोल्यानले लगानी, उत्पादन र आम्दानीको अनुमानित हिसाबकिताब पनि उल्लेख गरेका छन् । १ बिघा जग्गामा करिब १ हजार ४० वटा बिरुवा रोप्न सकिने भन्दै उनले यस आधारमा ५ वर्षमा के के हुन्छ भन्ने अनुमानित उपलब्धि उल्लेख गरेका हुन् ।
गोल्यानका अनुसार पहिलो वर्ष बगैंचा स्थापना, ड्रिप सिँचाइ तथा अन्य पूर्वाधारमा करिब ३ लाख ७९ हजार ६५० रुपैयाँ लगानी हुन्छ ।
दोस्रो वर्षबाटै यसले उत्पादन दिन थाल्छ । सुरु उत्पादन करिब ५ हजार किलो हुने र त्यसको मूल्य २ लाख ५० हजारसम्म हुने उनको अनुमान छ । यस आधारमा पहिलो वर्ष
ड्ड अनुमानित नाफास् रु। १,१६,२००
तेस्रो वर्ष उत्पादन बढेर २० हजार किलोग्राम पुग्ने गोल्यानको विश्लेषण छ । त्यसबाट १० लाख आम्दानी हुने र लागत कटाउँदा ५ लाख ९४ हजार २ सय रुपैयाँ नाफा आर्जन गर्न सकिने उनको विश्वास छ ।
चौथो वर्ष उत्पादन ३० हजार किलो हुने र त्यो उत्पादन १५ लाख मूल्यमा बिक्री हुने हिसाब प्रस्तुत गर्दै उनले खर्च कटाएर ८ लाख ८६ हजार ५ सय रुपैयाँ नाफा आर्जन गर्न सकिने उल्लेख गरेका छन् ।
पाँचौ वर्ष उत्पादन ५० हजार किलो पुग्ने र त्यसको अनुमानित बिक्री मूल्य २५ लाख रुपैयाँ हुन आउने गोल्यानको विश्वास छ । २५ लाखको अम्बा बिक्री गर्दा नाफा मात्रै १५ लाख हाराहारी हुने उनको हिसाब छ ।
यसरी १ बिघा जग्गामा अम्बा खेती गर्दा पहिलो वर्षदेखि ५ वर्षसम्म ५२ लाख ५० हजार रुपैयाँको अम्बा बिक्री गर्न सकिने बताउँदै उनले हरेक वर्ष थप हुँदै जाने लगानीको हिसाब गर्दा ५ वर्षमा २५ लाख ३२ हजार पुग्ने जनाएका छन् । कुल बिक्री र कुल लगानी घटाउँदा आउने ३० लाख ९६ हजार ८ सय रुपैयाँ नाफा हुने गोल्यानको विश्लेषण छ ।
उनले यसलाई उचित खेती व्यवस्थापन, मौसम तथा उत्पादनको आधारमा तयार गरिएको अनुमान भएको र वास्तविक उत्पादन, आम्दानी तथा नाफामा केही फरक पर्न सक्ने बताएका छन् ।
उनले आफूहरुको उद्देश्य केवल अम्बा खेती विस्तार गर्नु मात्र नभई नेपालको कुनै पनि उर्वर भूमी बाँझो नरहोस् र कुनै पनि किसानले आफ्नो उत्पादन बिक्री गर्न बजारको खोजीमा भौतारिनु नपरोस् भन्ने रहेको प्रष्ट पारेका छन् । उनले खाली जग्गा भएका र व्यावसायिक अम्बा खेती गर्न इच्छुकलाई माटो नेपालमा सम्पर्क गर्न आग्रह पनि गरेका छन् ।
