प्रधानमन्त्री केपी शर्मा ओलीले त्रिभुवन अन्तर्राष्ट्रिय विमानस्थल परिसरसँगैको इन्धन भण्डारण सार्न निर्देशन दिएका छन् । आज सिंहदरबारमा नवनियुक्त राज्य मन्त्रीहरुलाई निर्देशन दिने क्रममा प्रधानमन्त्री ओलीले सम्वद्ध मन्त्रीहरुलाई समेत निर्देशन दिँदै त्रिभुवन अन्तर्राष्ट्रिय विमानस्थल छेउको उक्त हवाइ इन्धन भण्डारण डिपो स्थानान्तरणको प्रबन्ध गर्न निर्देशन दिएका हुन् ।
सिनामंगल तर्फको नेपाल आयल निगमको हवाइ इन्धन डिपोले सुरक्षा खतरा बढिरहेको भन्ने गुनासो आइरहेका बेला प्रधानमन्त्री ओलीले उक्त डिपोलाई अन्यत्र स्थानान्तरण गर्न सम्बद्ध मन्त्री र राज्यमन्त्रीलाई निर्देशन दिएका हुन् ।
घना बस्तीको नजिकै हवाई इन्धन डिपो रहँदा अति जोखिम हुने भन्दै आयल निगमको सो हवाइ इन्धन डिपो सानुपर्ने आवाज उठिरहे पनि आयल निगमले अटेरी गरिरहेको छ । साउन ९ गते सौर्य एयरलाइन्सको जहाज दुर्घटना भएसँगै पुनः सर्वसाधारणले समेत उक्त डिपो स्थानान्तरण गर्नुपर्ने आवाज उठाइरहेका छन् ।
उक्त हवाइ इन्धन डिपोको क्षमता ७६ लाख ४० हजार लिटर छ । यसअघि नै उक्त डिपोलाई काठमाडौँ एयरपोर्टको उत्तरतर्फ नेपाली सेनाको गल्फ कोर्स भवन नजिकै सार्न ५० रोपनी जग्गा उपलब्ध गराइएको छ । तर, आयल निगमले स्थानान्तरण गर्न अटेरी गरिरहेको छ ।
