हेलिकप्टर सेवा प्रदान गर्न नयाँ एयरलाइन्स कम्पनीका रुपमा ‘सगरमाथा एयर’ आएको छ । सगरमाथा एयरले अब चाँडै व्यवसायिक उडान सुरु गर्नेछ । अहिले कम्पनीले नेपाल नागरिक उड्ययन प्राधिकरणबाट एयर अपरेटर सर्टिफिकेट लिने प्रक्रिया अन्तिम चरणमा पुर्याएको छ ।
यसका साथै, सगरमाथा एयरले माउण्टेन एयरसँग हेलिकप्टर पनि खदिरखरिद गरिसकेको छ । कम्पनीले 9N-AKB कलसाइन भएको हेलिकप्टर खरिद गरेको हो । कम्पनीका बजार प्रमुख सिताराम सापकोटाका अनुसार सुरुमा एउटा हेलिकप्टरबाट सेवा आरम्भ गर्ने तयारीमा कम्पनी छ ।
आउँदो अक्टुबर सम्ममा थप अर्को हेलिकप्टर पनि ल्याउने र सेवा सञ्चालन सुरु गरेको एक वर्षभित्र ३ वटा हेलिकप्टर पुर्याउने कम्पनीको लक्ष्य छ । उद्दार, माउण्टेन फ्लाई, हेलिकप्टर टूर, चलचित्र तथा भिडियो छायाङ्कन, कमर्शियल चार्टड उडान लगायतका सबै सेवा प्रदान गर्ने लक्ष्यका साथ सगरमाथा एयरले हेलिकप्टर सर्भिस सुरु गर्न लागेको सापकोटाको भनाइ छ ।
कम्पनीको एकाण्टेबल म्यानेजर ईन्जिनियर जनक थापा हुन् । अनुभवी र चर्चित हेलिकप्टर ईन्जिनियर थापा सहितको समूहले सगरमाथा एयर सुरु गरेको हो ।
