बेलायतको नेपाली समुदायको सबैभन्दा ठूलो खेलकुद तथा सांस्कृतिक उत्सव मानिने २४औँ गोर्खा कप सम्पन्न भएको छ। तामु धी यूके (Tamudhee UK) ले आयोजना गरेको यो प्रतियोगिता मे २४, २०२६ का दिन अल्डरसटको क्वीन्स एभिन्यू खेल मैदानमा सम्पन्न भएको हो।
कार्यक्रममा करिब २०,००० दर्शकको उपस्थिति रहेको आयोजकले जनाएका छन्। मेन क्याटेगोरी (पुरुष)तर्फ रङभङ समाज यूके ले गुरुजी एलिट एफसी लाई २-० गोलले पराजित गर्दै उपाधि जितेको छ। विजेताले £३,५०० नगद, शिल्ड, ट्रफी र प्रमाणपत्र प्राप्त गरे भने उपविजेताले £२,००० प्राप्त गरे।
भेटेरान्स क्याटेगोरीमा एफसी ०४ विजयी भएको भने महिला क्याटेगोरीमा तामाङ समाज एफसी विजयी भएको। यो पटक प्रतियोगितामा कुल ५६ टिम सहभागी थिए।
पुरस्कार वितरण कार्यक्रममा रनिमिड बरो काउन्सिलका मेयर क्यालम स्टेवर्ट प्रमुख अतिथिको रूपमा थिए। उनीसँगै तामु धी यूके अध्यक्ष जुम्काजी गुरुङ, हिमालयन जेटका अध्यक्ष दीपेन्द्र गुरुङ, एनआरएनए केन्द्रीय अध्यक्ष डा. हेमराज शर्मा, नेपाली दूतावासका मिलिटरी अटाशे ब्रिगेडियर जनरल अनुप शाह लगायतले विजयी टिम र खेलाडीहरूलाई पुरस्कार वितरण गरे। हिमालयन जेटका अध्यक्ष दीपेन्द्र गुरुङले प्रतियोगिताको मुख्य स्पोन्सरको रूपमा सहभागिता जनाउदै पुरस्कार वितरण गरेका हुन्।
गोर्खा कपले खेलकुदका साथै नेपाली संस्कृति, खाना, संगीत र समुदायबीचको एकतालाई पनि प्रबर्धन गर्दै आएको छ।
