नेपाल उद्योग वाणिज्य महासंघले बोनस शेयरमा कर नलगाउन सुझाव दिएको छ । आगामी आर्थिक वर्षको बजेटको लागि सुझाव पेश गर्दै महासंघले बोनस शेयरमा कर नलगाउन भनेको हो।
निकायले पूंजीकरण गर्ने बोनस शेयरले सो निकायको लगानीको क्षमता बढाउने भएकोले उक्त बोनस शेयरलाई लाभांसको रुपमा गणना गरी कर लगाउन नहुने महासंघले उल्लेख गरेको छ। यसो गर्दा अन्तर्राष्ट्रिय अभ्यास अनुकूल हुनुका साथै नाफा रकम पूंजिकृत भई व्यवसाय विस्तारका साथै रोजगारी सिर्जना गर्न र लगानी अभिबृद्धि हुने महासंघले जनाएको छ।
त्यस्तै महासंघले एकल आईजीन प्रणाली कायम राख्दै, प्रमोटर सेयरको लकइन अवधि निगरानी र कार्यान्वयनका लागि नियामकीय नियन्त्रण संयन्त्र लागू गर्न सुझाव दिएको छ।
महासंघले नेप्से र सिडिएसको पुनर्सरचना गरी निजी क्षेत्रको सहभागिता बढाउन र धितोपत्र बोर्डलाई स्वायत्त बनाउन पनि सुझाव दिएको छ। धितोपत्र बोर्डलाई स्वायत्त बनाई यसका काम कार्वाहीहरु पारदर्शी र सार्वजनिक जवाफदेही बनाउनु पर्ने महासंघले उल्लेख गरेको छ। यसबाट पुँजी बजारको स्वस्थ्य विकास गरी सर्वसाधारण लगानीकर्ताको विश्वास अभिवृद्धि हुने महासंघले जनाएको छ।
