प्रतिनिधिसभामा जेठ ४ गतेदेखि आगामी आर्थिक वर्षको विनियोजन विधेयकका सिद्धान्त तथा प्राथमिकता (कर प्रस्तावबाहेक)माथि छलफल हुने भएको छ। सभामुख डोलप्रसाद अर्यालले आगामी आर्थिक वर्षको विनियोजन विधेयकका सिद्धान्त तथा प्राथमिकता (कर प्रस्तावबाहेक)माथि छलफलका लागि आगामी जेठ ४, ५ र ६ गतेका दिनहरू तोकेका हुन्। यस छलफललाई प्रि बजेट छलफल पनि भनिन्छ ।
सभामुख अर्यालले छलफलमा भाग लिने सदस्यले जेठ ४ गतेको बैठकको एक घण्टा अगाडि कार्यव्यवस्था परामर्श समितिमा बुझाउन समय दिएका छन्। उनले उक्त छलफलको टिपोट गर्न अर्थ मन्त्रालय र सभाका सचिवालयका कर्मचारीलाई निर्देशन दिएका छन्।
हिजो अर्थमन्त्री डा स्वर्णिम वाग्लेले संसदमा आगामी आर्थिक वर्षको विनियोजन विधेयकका सिद्धान्त तथा प्राथमिकता पेश गरेका थिए। उनले ५ सिद्धान्त र ५ प्राथमिकता पेश गरेका छन् ।
