नेपाल उद्योग वाणिज्य महासंघको वरिष्ठ उपाध्यक्ष चयनको गृहकार्य सुरु भएको छ । प्रत्यक्ष निर्वाचनमार्फत चार जना उपाध्यक्षहरु र ६९ जना केन्द्रीय कार्यकारिणी समितिका सदस्यहरुको चयन भइसकेकाले अब वरिष्ठ उपाध्यक्ष चयनका लागि आन्तरिक गृहकार्य सुरु गरिएको एक जना पदाधिकारीले जानकारी दिएका छन् ।
निवर्तमान उपाध्यक्ष हेमराज ढकालले यसअघि नै वरिष्ठ उपाध्यक्षमा उम्मेदवारी घोषणा गरिसकेका छन् । अन्य आकांक्षीहरुमा निवर्तमान उपाध्यक्ष सुरकृष्ण वैद्य, पूर्व उपाध्यक्ष रामचन्द्र सांघाई छन् । निवर्तमान कोषाध्यक्ष भरतराज आचार्यलाई पनि वरिष्ठ उपाध्यक्षको सम्भावित उम्मेदवारका रुपमा हेरिएको छ ।
सहमतिको प्रयास सुरु
अध्यक्ष अन्जन श्रेष्ठले सहमतिबाटै वरिष्ठ उपाध्यक्ष चयनका लागि छलफल सुरु गरेका छन् । बिहिबार साँझ बस्ने केन्द्रीय कार्यकारिणी समितिको पहिलो बैठकमा पनि वरिष्ठ उपाध्यक्ष चयनबारे छलफल हुने बताइएको छ ।
‘सकेसम्म सहमतिबाटै वरिष्ठ उपाध्यक्ष चयन गर्ने मेरो लक्ष्य छ, निवर्तमान अध्यक्ष र पूर्व अध्यक्षहरुसँग पनि यस सम्बन्धमा एक चरणको कुराकानी भइसकेको छ । उहाँहरुले निर्वाचनमा जानुभन्दा सहमतिबाटै अघि बढ्दा राम्रो हुन्छ भन्नु भएको छ’ अध्यक्ष श्रेष्ठले भने, ‘सहमतिको कुरा अघि बढिरहेको छ । सर्वसम्मत हुन सकेन भने सबैले मान्ने निर्वाचनको विधि त छँदैछ ।’
बिहिबारको केन्द्रीय कार्यकारिणी समितिको बैठकले वरिष्ठ उपाध्यक्षको निर्वाचन मिति तोक्ने सम्भावना छ । सकेसम्म वरिष्ठ उपाध्यक्ष र कोषाध्यक्षको निर्वाचन एकैपटक गर्ने तयारीमा अध्यक्ष श्रेष्ठ देखिएका छन् ।
सुरकृष्ण वैद्यको सम्भावना उच्च
निर्वाचनको परिणाम अनुसार अध्यक्ष श्रेष्ठ समूह बहुमतमा छ । ५० प्रतिशत मतभार रहेको जिल्ला नगर समूहबाट श्रेष्ठ समूहका निर्वाचित केन्द्रीय सदस्य धेरै छन् । एसोसियटमा पनि एक जनाबाहेक सबै श्रेष्ठले समर्थन गरेकै समूहबाट निर्वाचित भएका छन् । वस्तुगततर्फ भने उपाध्यक्ष र बहुमत केन्द्रीय सदस्यहरु हेमराज ढकाल समर्थित छन् ।
यसअघि जिल्ला नगर उपाध्यक्ष रहेको र यसपटक जिल्ला नगरबाट दुबै जना उपाध्यक्षसहित बहुमत केन्द्रीय सदस्य जिताउन भूमीका खेलेको भन्दै सुरकृष्ण वैद्यलाई सहमतिबाटै वरिष्ठ उपाध्यक्ष बनाउनुपर्ने आवाज उठ्न थालेको छ । यसमा अन्जन श्रेष्ठले ‘ग्रीन सिग्नल’ दिएको बताइन्छ ।
प्रदेश भूगोलबाट आएका १४ जनामध्ये अधिकांश केन्द्रीय सदस्यहरु अन्जन समर्थित छन् । प्रदेश खुलाबाट निर्वाचित भएका १५ जनामध्ये १३ जना पनि अन्जन टिमकै छन् । एक जना सुर्दशन कार्की भने कतै खुलेका थिएनन् । प्रदेश खुलाबाट निर्वाचितमध्ये हेमराज समर्थित उज्वल प्रसाद कसजु मात्रै छन् ।
यस आधारमा सुरकृष्ण वैद्य वरिष्ठ उपाध्यक्ष बन्ने सम्भावना अत्याधिक रहेको बताइएको छ । ‘उहाँ (सुरकृष्ण वैद्य) ले म उठ्दिन भनेको हकमा बाहेक अब उहाँ नै हो’ बिहिबार बिहानको भेटमा एक जना केन्द्रीय सदस्यले भने ।
यसअघि वरिष्ठ उपाध्यक्षमा आकांक्षा राखेका दिनेश श्रेष्ठ, किशोर प्रधान लगायतले भने उम्मेदवारी नदिने पक्का भइसकेको स्रोतले बताएको छ ।
