नेपालमा राइड–सेयरिङको कल्चर विकास गर्न महत्वपूर्ण भूमिका खेल पठाओ नेपालका सह–संस्थापक एवं म्यानेजिङ डाइरेक्टर असीम मान सिंह बस्न्यात कम्पनीबाट औपचारिक रूपमा बिदा भएका छन्। उनले लिङ्कडइनमा ‘Signing Off!’ भन्दै पोस्ट गरेर आफ्नो ८ वर्ष लामो यात्राको समापन गरेको जानकारी दिएका हुन्।
पठाओ नेपालले उनको नेतृत्व र दृष्टिकोणको प्रशंसा गरेको छ। पठाओले भनेको छ “एक विश्वासबाट सुरु भएको यात्रा नेपालको यातायातलाई परिवर्तन गर्ने स्तरमा पुग्यो। असीम मान सिंह बस्न्यातलाई उहाँको नेतृत्व र भिजनका लागि धन्यवाद। हामी यो यात्रालाई अघि बढाउँछौं,” । पठाओ नेपालले उनको योगदानलाई सधैं सम्झने र कम्पनीको विकासलाई निरन्तरता दिने जनाएको छ।
असीम बस्न्यातले सन् २०१८ मा बंगलादेशको पठाओसँगको सहकार्यमा नेपालमा सेवा सुरु गरेका थिए। उनको नेतृत्वमा पठाओ नेपालले काठमाडौंबाट सुरु भएको राइड–सेयरिङ सेवा देशका विभिन्न शहरहरूमा विस्तार गर्यो। बाइक राइड, फुड डेलिभरी र लजिस्टिक्स जस्ता क्षेत्रमा विस्तार गर्दै यसले हजारौं युवालाई रोजगारीको अवसर सिर्जना गर्यो र नेपालको डिजिटल इकोनोमी तथा गिग इकोनोमीको विकासमा महत्वपूर्ण भूमिका खेलेको छ।
बस्न्यात पठाओ नेपालको म्यानेजिङ डाइरेक्टर र फाउन्डिङ बोर्ड मेम्बरका रूपमा सक्रिय थिए। उनको बिदाइसँगै पठाओ नेपालले नयाँ नेतृत्वसँग अघि बढ्ने संकेत गरेको छ।
उनी गत निर्वाचनमा स्वतन्त्र उम्मेदवारका रूपमा काठमाडौं क्षेत्र नम्बर १ बाट प्रतिनिधिसभा निर्वाचनमा उम्मेदवारी घोषणा गरेका थिए।
