राष्ट्रपतिबाट फिर्ता भएको संवैधानिक परिषद् (पहिलो संशोधन) अध्यादेश २०८३ हुबहु जारी गर्नको लागि सरकारले फेरि राष्ट्रपति समक्ष सिफारिस गरेको छ। आज बसेको मन्त्रिपरिषद्को बैठकले संवैधानिक परिषद् सम्बन्धी अध्यादेश पुन: जारी गर्न राष्ट्रपतिसमक्ष सिफारिस गरेको हो।
सरकारका प्रवक्ता सस्मित पोखरेलले सोमबार बसेको मन्त्रिपरिषद् बैठकले संवैधानिक परिषद् (पहिलो संशोधन) अध्यादेश २०८३ जारी गर्नका लागि पुन: सिफारिस गर्ने निर्णय गरेको जानकारी दिए । उनका अनुसार अध्यादेश हुबहु नै अर्थात् कुनै परिमार्जन नगरि जारी गर्नको लागि सिफारिस गरिएको छ ।
सरकारले कुल ८ वटा अध्यादेश सिफारिस गरेकोमा राष्ट्रपतिले संवैधानिक परिषद् बाहेक ७ वटा अध्यादेश जारी गरेका थिए। संवैधानिक परिषद् अध्यादेश भने उनले पुनर्विचार गर्न सरकारलाई फिर्ता गरेका थिए। तर सरकारले फेरि सो अध्यादेश हुबहु जारी गर्नको लागि राष्ट्रपतिलाई सिफारिस गरेको हो।
