निजी क्षेत्र त्रसित हुनुपर्ने अवस्था सिर्जना भएको भन्दै निजी क्षेत्रका ३ ठूला संगठनले असन्तुष्टि जनाएका छन् । नेपाल उद्योग वाणिज्य महासंघ, नेपाल उद्योग परिसंघ र नेपाल चेम्बर अफ कमर्सले संयुक्त रुपमा धारणा सार्वजनिक गर्दै नयाँ सरकार बनेपछि लगानीको वातावरण बन्द भनेर अपेक्षा गरिएको भएपनि निजी क्षेत्र त्रसित हुनुपर्ने वातावरण सिर्जना भएको जनाएका हुन् ।
उद्यमी व्यवसायीमाथि भै रहेको धरपकड र थुनछेकबाट निजी क्षेत्र निरुत्साहित भएको र अर्थतन्त्रमा ८१ प्रतिशत र रोजगारीमा ८६ प्रतिशत योगदान पुर्याइरहेको निजी क्षेत्र त्रसित हुनुपर्ने अवस्था सिर्जना हुँदा यसले अर्थतन्त्र, रोजगारी, राजश्व एवं पुर्वाधार निर्माणमा समेत गम्भीर असर पर्ने तीन वटै संगठनले जनाएका छन् ।
आर्थिक कसुरका सम्बन्धमा पहिले सुन्ने अनि कसुर प्रमाणित भएपछिमात्र थुन्ने दृष्टिकोण र व्यवहार गर्न निजी क्षेत्रले सरकारलाई ध्यानाकर्षणसमेत गराएको छ ।
उद्यमी व्यवसायीहरुले अनुसन्धानलाई सघाउन आफू पूर्ण तयार रहेको र प्रहरीले बोलाएको समयमा उपस्थित हुने जानकारी गराउँदा गराउँदै पनि आर्थिक कसुरकै अभियोजनमा पक्राउ गरिनुले समग्र निजी क्षेत्रलाई चिन्तित एवं दुःखी बनाएको उनीहरुको धारणा छ । उद्यमी व्यवसायीमाथि धरपकड हुँदा व्यक्तिमात्र नभइ लाखौं रोजगारी, आपूर्ति श्रृखला, बैंकिग क्षेत्र र सम्पूर्ण प्रणालीमै गम्भीर धक्का पुग्न गई अर्थतन्त्र गम्भीर संकटमा पर्ने तर्फ समेत निजी क्षेत्रले चिन्ता व्यक्त गरेको छ ।
