जेन् जी आन्दोलनका क्रममा आगजनीमा परेको भाटभटेनी सुपरमार्केटको चितवनस्थित आउटलेट सञ्चालनमा आएको छ । आउटलेट पुनः सञ्चालनमा ल्याउनका लागि आयोजना गरिएको कार्यक्रममा भाटभटेनीले सबैलाई निमन्त्रणा पठाएको थियो । निमन्त्रणा पाएकामध्ये एक थिए चितवनका प्रमुख जिल्ला अधिकारी गणेश अर्याल ।
अर्यालले भाटभटेनीको पुनः सञ्चालन सम्बन्धि औपचारिक कार्यक्रममा सहभागी भएनन् । बरु उनले भाटभटेनीलाई मर्मस्पर्शी सन्देश पठाएर कार्यक्रममा सहभागी हुने नैतिक हक आफूसँग नभएको बताएका छन् । उनले भटभटेनीको खुशीको पलमा साक्षी बन्ने नैतिक हक आफूसँग नभएको भन्दै भावुक सन्देश पठाएका हुन् ।
‘भाई निम्ताका लागि धेरै धेरै धन्यवाद । तर मेरो विवेकले मलाई बारम्बार भनिरहेको छ—आफ्नो जिम्मेवारीमा हुँदा भाटभटेनी बचाउन सकिएन । अहिले तपाईंहरू उठ्नुभयो, खुशीको पलको साक्षी बन्ने नैतिक हक मसित छैन,” उनले भनेका थिए । तर, अपरान्ह भने उनी भाटभटेनी पुगेका थिए ।
