नेपाल उद्योग वाणिज्य महासंघको केन्द्रीय सदस्यमा बटु लामिछानेले उम्मेदवारी दिएका छन् । उनले एसोसियट तर्फबाट केन्द्रीय सदस्यमा उम्मेदवारी दिएका हुन् ।
नेपालको अपार जलस्रोतको उपयोग गर्ने नीति आवश्यक रहेको बताउँदै आएका लामिछानेले करिब २५ वर्षदेखि जलविद्युत क्षेत्रमा सक्रिय छन् । ‘यो अनुभवलाई नीति निर्माणको तहमा महासंघमार्फत योगदान दिने उदेश्यले मैले केन्द्रीय सदस्यमा उम्मेदवारी दिएको हुँ’ उनले भने, ‘जलविद्युत क्षेत्रको विकासका लागि बाधक बनेका प्रावधानहरु हटाउन मैले प्रयत्न गर्नेछु ।’
उनले देशका लागि अतिआवश्यक र निर्यातमार्फत सहजै ठूलो आम्दानी गर्न सकिने क्षेत्र जलविद्युत भएकाले यो विषय नागरिक र सरकारलाई बुझाउन आवश्यक रहेको बताएका छन् । आफूले यस क्षेत्रमा काम गर्दा जलविद्युत विकासकर्ताहरु र इक्वीपमेन्ट सप्लायर्सहरुको दुःख, पीडा र मर्का बुझेको बताउँदै उनले ति समस्याहरुको समाधानमा केन्द्रित हुने आफ्नो योजनासमेत सुनाएका छन् ।
‘समृद्ध नेपाल निर्माणमा निजी क्षेत्रको महत्वपूर्ण र मुख्य योगदान रहन्छ’ लामिछाने भन्छन्, ‘एफएनसीसीआई मार्फत निजी क्षेत्रमैत्री नीति निर्माणमा सहयोग गर्ने र जलविद्युत क्षेत्रमा रहेको मेरो अनुभवलाई उपयोग गर्ने उदेश्यले मैले केन्द्रीय सदस्यमा उम्मेदवारी दिएको हुँ । मैले निजी क्षेत्रमैत्री नीति निर्माणमा सहयोग गर्ने र पहल गर्नेछु ।’
उनी वाणिज्य बैंक र महालेखाको जागिर छोडेर व्यवसायमा होमिएका उद्यमी हुन् । गलैँचा र धागोको व्यवसायबाट यात्रा सुरु गरेका लामिछाने अहिले जलविद्युत क्षेत्रमा सक्रिय छन् । उनी र उनका साझेदारहरुको नेतृत्वमा अहिले सम्पन्न भएका र निर्माणाधिन गरेर ५०० मेगावाट भन्दा बढी क्षमताका आयोजना छन् ।
यो पनि : बैंक र महालेखाको जागिर छोडेर व्यवसायमा आएका बटु: गलैँचाबाट सुरु, बनाए दर्जनौँ हाइड्रो
