हुलाक सेवा विभागले रामेछापको मन्थलीमा अन्तरक्रिया कार्यक्रम आयोजना गरेको छ । विभागले स्थानीय तह, विद्यार्थी र सञ्चारकर्मीहरुको उपस्थितिमा अन्तरक्रिया आयोजना गरेको हो ।
हुलाक सेवा विभागका निर्देशक लिलाराज पौडेलले अन्तरक्रियाका क्रममा अहिलेको समयमा हुलाक सेवाको महत्व, काम र जिम्मेवारीका सन्दर्भमा जानकारी प्रदान गरेका थिए । उनले हुलाक सेवा केवल चिठी पत्र आदान–प्रदान गर्ने निकाय मात्रै नभई यो विशिष्ठ प्रकृतिको संरचना भएको बताएका छन् ।
कार्यक्रममा सहभागीहरुले अहिलेको आधुनिक समयमा हुलाकको सेवा कसरी प्रभावकारी बनाउन सकिन्छ भन्ने सन्दर्भमा जिज्ञासा राखेका थिए । सहभागीहरुले राखेका जिज्ञासाको जवाफ दिँदै निर्देशक पौडेलले हुलाकको विश्वब्यापी अभ्यास र सम्पन्न देशहरुमा समेत यसको प्रचलन र विश्वसनीयता कस्तो छ भन्ने विषय जानकारी गराएका थिए ।
हुलाक सेवा व्यवसायिक कार्गो र कुरियर सर्भिस जस्तो हुने नभई यो सेवामूलक र सरकारी निकाय बीचको पत्राचारको माध्यमसमेत रहेको पौडेलले जानकारी दिएका छन् । यसले अन्तर सरकारी निवेदन तथा पत्राचारहरु व्यवस्थित गर्ने काम समेत गरिरहेको उनको भनाइ छ ।
