दुई सम्प्रदायबीच झडप भएपछि उत्पन्न तनावग्रस्त स्थितिका कारण जिल्ला प्रशासन कार्यालय रौतहटले गौर नगरपालिका क्षेत्रमा कर्फ्यु आदेश जारी गरेको छ । प्रमुख जिल्ला अधिकारीको अध्यक्षतामा बसेको जिल्ला सुरक्षा समितिको बैठकले फागुन ९ गतेदेखि अर्को आदेश नभएसम्म कर्फ्यु लगाएको हो ।
कर्फ्यु अवधिभर तोकिएको क्षेत्रमा कसैले पनि आवतजावत गर्न, कुनै प्रकारको भेला, सभा, जुलुस तथा प्रदर्शन गर्न पाइने छैन । स्थानीय प्रशासन ऐन, २०२८ को दफा ६ (क) बमोजिम कर्फ्यु आदेश जारी भएको हो ।
प्रशासनले पूर्वमा मुडबलवा गेट, पश्चिममा लालबकैया बाँध, उत्तरमा चम नहर र दक्षिणमा गौर भन्सार कार्यालयसम्म कर्फ्यु लगाइएको छ ।
प्रशासनले सेना परिचालन समेत गरेको छ ।
