नेपालमै विद्युतीय बस एसेम्बल भएको छ । सुन्दर अटो इन्जिनियरिङ प्रा. लि.ले नेपालमै पहिलोपटक विद्युतीय बस एसेम्बल गरेको हो ।
कम्पनीका अध्यक्ष भेषबहादुर थापाका अनुसार अहिले १४ सिट क्षमताका ४० वटा विद्युतीय बस एसेम्बल गरेर परीक्षण पनि सकिएको छ । उनका अनुसार सुन्दर अटो इन्जिनियरिङलाई ११/१२ जना यातायात व्यवसायीहरुले नेपालमै विद्युतीय बस एसेम्बल गर्न र ति बसहरु आफूले खरिद गर्ने भनेपछि कम्पनीले एसेम्बल गरेर तयार पारको हो ।
अध्यक्ष थापाका अनुसार ४० वटा बसमध्ये ३ वटा बस सडकमा गुडाएर परीक्षण गरिसकिएको छ । तयार पारिएका विद्युतीय बसहरुमा ६० प्रतिशत पाटपुर्जा स्वदेशी नै प्रयोग गरिएको र ४० प्रतिशत पाटपुर्जा भने भारत र चीनबाट आयात गरिएको अध्यक्ष थापाको भनाइ छ ।
अध्यक्ष थापाले भने अनुसार १४ सिट क्षमतामा तयार पारिएको यो विद्युतीय बसले एक पटकको फुल चार्जमा १५० किलोमिटर सम्मको रेन्ज दिएको छ ।
कम्पनीले सरकारी निकायको साथ पाए व्यवसायिक रुपमै गाडी उत्पादन गर्ने लक्ष्य रहेको बताएको छ । यसका लागि नेपालमै एसेम्बल भएका सवारी साधनहरुलाई सहज रुपमा दर्तादेखि पार्टस् र नन् एसेम्बल कम्पोनेन्टको आयातमा सहजीकरण आवश्यक रहेको कम्पनीको भनाइ छ ।
