बुट मोडलमा १४ वटा हाइड्रो बनाउन विद्युत विकास विभागले फेरि माग्यो आशयपत्र

विद्युत विकास विभागले बुट मोडलमा १४ वटा हाइड्रोपावर आयोजना निर्माण गर्नको लागि फेरि आशयपत्र माग गरेको छ। यस अघि आशयपत्र जारी गर्दा आवेदन नपरेपछि विभागले पुस १ गते फेरि योग्य तथा इच्छुक कम्पनीहरुसंग आशयपत्र माग गरेको हो।

विभागले सार्वजनिक निजी साझेदारी तथा लगानी ऐन २०७५, र सार्वजनिक निजी साझेदारी तथा लगानी ऐन नियमावली २०७७ को व्यवस्था अनुसार  ति आयोजना बनाउनको लागि आशयपत्र माग गरेको हो ।  योग्य तथा इच्छुक कम्पनीले २०२६ जनवरी १६ दिउँसो १२ बजेसम्ममा आशयपत्र पेश गरिसक्नु पर्ने छ।

विभागले परेका आशयपत्रलाई मुल्यांकन गरेर योग्य कम्पनीलाई सर्टलिस्ट गर्ने छ । कम्पनी सर्टलिस्ट गर्दा  प्रविधिक क्षमतालाई ३० प्रतिशत, वित्तीय क्षमतालाई अधिकतम ४० प्रतिशत र आयोजना निर्माणको अनुभवलाई ३० प्रतिशतको अंकभार अनुसार गरिने छ।

आशयपत्र पेश गरेपछि विभागले कम्पनीलाई सर्टलिस्ट गर्ने छ। सर्टलिस्टमा परेका कम्पनीले विभागमा प्राविधिक र आर्थिक प्रस्ताव पेश गर्नु पर्ने छ। ति मध्ये सबैभन्दा बढी upfront fee पेश गर्नेलाई छनौट हुने छ ।

छनौट हुने कम्पनीलाई विभागले विद्युत ऐन २०४९ र विद्युत नियमावली २०५० को व्यवस्था अनुसार बुट मोडलमा आयोजना निर्माण गर्नको लागि लाईसेन्स प्रदान गर्ने छ।

आशयपत्र माग गरिएका आयोजनामा २.५२ मेगावाटको देखि ६१.०२ मेगावाटसम्मका आयोजना हुन् । यी आयोजना वातावरणीय प्रभाव मुल्यांकन र सम्भाव्यता अध्ययन पनि सम्पन्न भईसकेका आयोजना हुन् ।

कुन कुन आयोजना छन् समावेश ?

• हुम्ला कर्णाली जलविद्युत आयोजना (६१.०२ मेगावाट) – हुम्ला जिल्ला
• इङ्खु खोला जलविद्युत आयोजना (२१.४ मेगावाट) – सोलुखुम्बु जिल्ला
• अपर चमेलिया जलविद्युत आयोजना (५३.८५ मेगावाट) – दार्चुला जिल्ला
• कवाडी खोला–१ जलविद्युत आयोजना (३३.३ मेगावाट) – हुम्ला र बाजाङ जिल्ला
• कवाडी खोला जलविद्युत आयोजना (३० मेगावाट) – हुम्ला र बाजुरा जिल्ला
• जुगाडा बुढीगंगा जलविद्युत आयोजना (१५.५ मेगावाट) – बाजुरा जिल्ला
• जावा खोला जलविद्युत आयोजना (१५.२५ मेगावाट) – जुम्ला जिल्ला
• म्याग्दी खोला जलविद्युत आयोजना (१५.२ मेगावाट) – म्याग्दी जिल्ला
• बुढीगंगा सानो जलविद्युत आयोजना (१०.८५ मेगावाट) – बाजुरा जिल्ला
• रूपागढ जलविद्युत आयोजना (८.६२५ मेगावाट) – डोल्पा  जिल्ला
• लुङ्ग्री खोला जलविद्युत आयोजना (६ मेगावाट) – रोल्पा जिल्ला
• भेरी खोला जलविद्युत आयोजना (४.१ मेगावाट) – जुम्ला जिल्ला
• न्याउरीगाड जलविद्युत आयोजना (४.०१५ मेगावाट) – जुम्ला जिल्ला
• डोटीगाड जलविद्युत आयोजना (२.५२ मेगावाट) – डडेल्धुरा जिल्ला