लुम्बिनी लायन्स सिद्धार्थ बैंक एनपीएल सिजन–२ को प्लेअफमा प्रवेश गरेको छ । आज भएको खेलमा जनकपुर बोल्ट्सलाई पराजित गर्दै लुम्बिनी लायन्स प्लेअफमा प्रवेश गरेको हो ।
लिग चरणको आफ्नो अन्तिम खेलमा जनकपुरलाई ४ विकेटले पराजित गर्दै लुम्बिनी प्लेअफमा पुगेको हो ।
यससँगै प्लेअफमा पुग्ने ४ वटै टोलीको टुंगो लागेको छ । सुदूरपश्चिम रोयल्स, काठमाण्डु गोर्खाज र विराटनगर किंग्स यसअघि नै प्लेअफमा पुगिसकेका छन् ।
आजको खेलमा लुम्बिनी विजयी हुँदै प्लेअफमा प्रवेश गरेपछि एकसाथ पोखरा एभेन्जर्स, जनकपुर बोल्ट्स र चितवन राइनोज प्लेअफ दौडबाट बाहिरिएका छन् । कर्णाली याक्स यसअघि नै बाहिरिसकेको थियो ।
आजको खेलमा जनकपुरले दिएको १३३ रनको लक्ष्य पछ्याएको लुम्बिनीले १९.१ ओभरमा ६ विकेट गुमाएर लक्ष्य भेट्टायो । लुम्बिनीका लागि कप्तान रोहित पौडेलले सर्वाधिक ३४ रन बनाए ।
टस जितेर ब्याटिङ गरेको जनकपुर बोल्ट्सले २० ओभर खेल्दै ६ विकेट गुमाएर १३२ रन बनाएको थियो ।
