डेडिकेटेड तथा ट्रंकलाइनको महशुल विवादमा ५९ उद्योगले आफैँ बिजुलीको लाइन काटेका छन् । नेपाल विद्युत प्राधिकरणले असार २५ र २६ गते विभिन्न ६ उद्योगको लाइन काटेपछि उद्योगीले विज्ञप्ति जारी गर्दै तत्काल ति उद्योगमा बिजुली नजोडिएन बाँकी सबै उद्योगको लाइन आफैँले काट्ने चेतावनी दिएका थिए ।
उद्योगीहरुको चेतावनी पश्चात पनि प्राधिकरणले बिजुली नजोडेपछि उद्योगीहरुले आफैँ लाइन काटेका हुन् । डेडिकेटेड–ट्रंकलाइनको बक्यौता विवाद समाधान गर्न सरकारले बनाएको उच्चस्तरीय जाँचबुझ आयोगको सिफारिस कार्यान्वयन गर्ने सरकारको निर्णय मान्न छोडेर प्राधिकरणले उद्योगीलाई तर्साउने र धम्काउने काम गरेको भन्दै उनीहरुले आपत्ति जनाउँदै आएका छन् ।
उद्योगीहरुलाई बिना कारण धम्क्याउने काम प्राधिकरणको नेतृत्वबाट भइरहेको भन्दै उद्योगीहरुले आइतबार एक विज्ञप्ति जारी गर्दै सबै उद्योगमा स्वतःस्फूर्त रूपमा बिजुली कटौती गरिएको जनाएका हुन् ।
उद्योगीहरूले पूर्व न्यायाधीश गिरिशचन्द्र लाल नेतृत्वमा गठित न्यायिक आयोगको सिफारिस कार्यान्वयन नगरी प्राधिरकणले छापामार शैलीमा विद्युत लाइन काटिएको भन्दै विरोध जनाइरहेका छन् ।
उनीहरुले प्रमाणसहित बिल जारी गरेमा महशुल तिर्न तयार रहेको पनि दोहोर्याउँदै आएका छन् ।
