जेनजी आन्दोलनका क्रममा भाटभटेनी सुपरमार्केटका देशभरका १२ वटा आउटलेट पूर्णरूपमा जले। अरु ९ वटा आउटलेटमा तोडफोड र लुटपाट भए ।
अकल्पनीय क्षतिपछि भाटभटेनी फेरि उठ्न थालेको छ । भाटभेटेनीले आजबाट १६ वटा आउटलेट ग्राहकको लागि खुला गरेको छ। जस मध्ये काठमाडौँ उपत्यकाका ९ वटा स्टोर रहेका छन् भने बाँकि ७ वटा काठमाडौँ उपत्यका बाहिरका छन् ।
सेवा दिन थालेका आउटलेटमा काठमाडौँ भित्रका टोखा, सातदोबाटो, अनामनगर, त्रिपुरेश्वर, पाटन, कलंकी, राधे राधे र बालाजु रहेका छन् । त्यस्तै उपत्यका बाहिरका नेपालगंज, जनकपुर, बुटवल, बिरगंज, धनगढी, इटहरी, र भैरहवा रहेका छन् । हालको लागि यी स्टोर दिउँसो २:३० देखि बेलुका ८:३० बजेसम्म खुला रहने छन्।
भाटभटेनी केवल एक स्टोर मात्र नभई, यो परिवार भएकोले अब फेरि परिवारको रूपमा उभिएको भाटभटेनीले जनाएको छ। ग्राहकको धैर्यता, समर्थन र विश्वासको लागि धन्यवाद दिदै भाटभटेनीले फेरि पनि पहिले जस्तै सेवा दिने प्रतिवद्दता जनाएको छ।
सामाजिक संजालमा ‘यसपटक दशैं–तिहार किनमेल भाटभटेनीमा गर्ने अभियान’
यस संगै सामाजिक संजालमा यसपटक दशैं–तिहार किनमेल भाटभटेनीमा गर्ने अभियान सुरु भएको छ । पत्रकार नारायण अमृतले फेसबुकमा यो अभियान सुरु गरेका हुन् । उनले लेखका छन् ‘संकटका बेला विवेकको अहम् अर्थ हुन्छ। सानो अनुक्रमको पनि अर्थ हुन्छ। जेनजी आन्दोलमा भएको घुसपैठबाट क्षति बेहोरोको भाटभटेनी उठ्न जरुरी छ। त्यहाँ आश्रित सयौं श्रमजीवीको घरको चुलो बल्न जरुरी छ। उदारमना व्यवसायी मिनबहादुर गुरुङ दाइको आत्मबल उन्नत हुन जरुरी छ। जति सक्छु, गच्छेअनुसार हुने मेरो यसपकटकको चाडबाड किनमेल भाटभटेनीमा हुने छ।’
उनलाई साथ दिदै पत्रकार टिकाराम यात्रीले पनि सोहि सामग्री शेयर गरेका छन् । अन्य धेरैले पनि यस अभियानमा साथ दिएका छन् । यद्यपि कतिपयले भने भाटभटेनीका संचालक मिन बहादुर गुरुङलाई पार्टीलाई सहयोग गर्ने रकम सामाजिक कार्यमा खर्च गर्न आग्रह गरेका छन् ।
अकल्पनीय क्षति
जेनजी आन्दोलमा भाटभटेनीलाई अकल्पनीय क्षति पुगेको छ। कम्पनीका प्रमुख सञ्चालन अधिकृत पानु पौडेलका टंगाल, महाराजगञ्ज, बौद्ध, कोटेश्वर, बालुवाटार गोदाम, पोखरा, चितवन, हेटौंडा, विर्तामोड, दमक, विराटनगर र धरानका आउटलेटहरु पूर्णरुपमा ध्वस्त भएका छन् । कलंकी, ठिमी, बालाजु, जनकपुर, बुटवल, वीरगञ्ज, धनगढी, इटहरी र भैरहवा आउटलेटमा भने तोडफोड र लुटपाट भएको छ। कुल क्षतिको विवरण संकलन गर्न ४ हप्तासम्म समय लाग्न सक्ने जनाइएको छ । कुल कारोबारको ८० प्रतिशत हिस्सा ओगट्ने २१ आउटलेटहरुमा क्षति हुँदा १५ सयभन्दा बढीले रोजगारी गुमाएका छन् ।
यस अघि : जेनजीको आवरणमा ठूलो रोजगारदातामाथि आक्रमणः भाटभटेनीका १२ आउटलेट खरानी
