माबिलुङ्ग इनर्जी लिमिटेडले निष्काशन गरेको आईपीओ अर्को साता मात्र बाँडफाँड हुने भएको छ। बिक्री प्रबन्धक लक्ष्मी सनराइज क्यापिटलका अनुसार प्राप्त आवेदनहरु मध्येबाट डुप्लिकेट आवेदनहरु भेरिफाई गर्ने क्रममै रहेकोले आईपीओ बाँडफाँड अर्को साता मात्र बाँडफाँड हुने छ ।
आईपीओको प्रि अलोटमेन्ट भोलि बिहीबार गर्ने क्यापिटलको तयारी रहेको छ। योजना अनुसार काम भएमा आगामी आइतबार शेयर फाँडफाँड हुने क्यापिटलले जनाएको छ। यद्यपि सफ्टवेयरमा समस्या आएमा १/२ दिन ढिलो हुन सक्ने क्यापिटलले उल्लेख गरेको छ।
कम्पनीले साउन २६ देखि २९ गतेसम्म आईपीओ निष्काशन गरेको थियो। कम्पनीले सर्वसाधारणलाई १२ लाख ४८ हजार ९ सय ४ कित्ता शेयर निष्काशन गरेको हो।
कम्पनीले यस अघि नै संखुवासभाका आयोजना प्रभावित स्थानीय र श्रम स्वीकृति लिई वैदेशिक रोजगारीमा रहेका नेपालीलाई आईपीओ निष्काशन बाँडफांड गरिसकेको छ । यस कम्पनीमा एशियन लाइफ इन्स्योरेन्सको २५ प्रतिशत, गुहेश्वरी मर्चेन्ट बैंकिंग एण्ड फाइनान्सको २० प्रतिशत, र राजेश लाल श्रेष्ठको ११ प्रतिशत लगानी रहेको छ। यद्यपि आईपीओ निष्काशन पछि उनीहरुको स्वामित्व घट्ने छ।
कम्पनीले संखुवासभामा ४.९५ मेगावाटको अपर पिलुवाखोला ३ जलविद्युत आयोजना निर्माण गरिरहेको छ।
