नेपाल उद्योग वाणिज्य महासंघका अध्यक्ष चन्द्रप्रसाद ढकालले अर्डर भइसकेका यूरो–६ भन्दा कम मापदण्ड भएका गाडी एकपटकका लागि आयात गर्न दिन सरकारसँग आग्रह गरेका छन् ।
नाडा अटोमोबाइल्स एसोसिएशन अफ नेपालको आयोजनामा भृकुटीमण्डपमा सुरु भएको नाडा अटो शो २०२५ को उद्घाटनका अवसरमा बोल्दै उनले सरकारले लागू गरेको यूरो–६ सरहको मापदण्ड सकारात्मक भए पनि तत्काल कार्यान्वयनले केही समस्या निम्त्याउन सक्ने भन्दै एकपटक उक्त मापदण्ड भन्दा कमका गाडीलाई पनि आयातको अनुमति दिन आग्रह गरेका हुन् ।
अध्यक्ष ढकालको सो आग्रहसँगै प्रधानमन्त्री केपी शर्मा ओलीले महासंघका अध्यक्षले उठाएको माग सकारात्मक भएको र यस विषयमा सरकारले विचार गर्ने प्रतिक्रिया दिएका छन् ।
कार्यक्रममा अध्यक्ष ढकालले नाडा अटो शोले बजार र ग्राहकलाई जोड्न महत्वपूर्ण भूमिका खेल्ने बताए । पछिल्लो समय इलेक्ट्रिक गाडीको आयात बढिरहेको उल्लेख गर्दै उनले नेपालमा गाडी एसेम्बल उद्योग, डाटा सेन्टर र वातावरणमैत्री उत्पादनको सम्भावना रहेको समेत बताएका छन् ।
उनले दुई वर्षअघि भन्दा अहिले सवारीसाधनको बिक्री करिब ४० प्रतिशतले वृद्धि भएको र यसले बजारमा विश्वास बढेको संकेत गर्ने पनि बताए ।
