विद्युत नियमन आयोगले अनुपात घटाएर मन्दाकिनी हाइड्रोपावर लिमिटेडलाई हकप्रद निष्काशनको लागि पूर्व स्वीकृति दिएको छ । आयोगले साउन २६ गते कम्पनीलाई हकप्रद निष्काशनको लागि पूर्व स्वीकृति प्रदान गरेको छ।
कम्पनीले हाल कायम चुक्ता पुँजीको १२५ प्रतिशत हकप्रद निष्काशन गर्ने गरि नियमन आयोगमा स्वीकृतिको लागि प्रस्ताव पठाएको थियो। तर आयोगले ६६.२८ प्रतिशत मात्र हकप्रद शेयर निष्काशनको लागि अनुमति दिएको हो। हाल कम्पनीको चुक्ता पुँजी ६४ करोड ६७ लाख ६७ हजार १ सय रुपैयाँ रहेको छ। आयोगले कम्पनीलाई ४२ करोड ९४ लाख २४ हजार २ सय ५० रुपैयाँ ३० पैसा बराबरको मात्र हकप्रद निष्काशनको लागि पूर्व स्वीकृति दिएको हो।
अब नेपाल धितोपत्र बोर्डले अनुमति दिएपछि कम्पनीले हकप्रद निष्काशन गर्ने छ। कम्पनीले हकप्रद निष्काशनको लागि ग्लोबल आइएमई क्यापिटललाई बिक्री प्रबन्धक चयन गरिसकेको हो ।
