नाइमा नेपाल मोबिलिटी एक्स्पो आज सकिँदैछ । सुरु हुँदा साउन २१ गतेदेखि २५ गतेसम्म आयोजना हुने भनिएपनि अवलोकनकर्ताको उत्साह बढेपछि एक दिन थप गरिएको थियो ।
नेपाल अटोमोबाइल इम्पोर्टर्स एन्ड म्यानुफ्याक्चर्स एसोसिएसन (नाइमा)का अनुसार एक्स्पोमा अवलोकनकर्ताको घुइँचो देखिएको छ । गाडी हेर्ने, नयाँ नयाँ मोडलबारे रुची राख्ने, गाडीको बारेमा सोधपुछ गर्ने, बुकिङ गर्ने र खरिद गर्नेहरुको घुइँचो रहेको नाइमाले जनाएको छ ।
नाइमाका अनुसार अहिलेसम्म ९१ हजारभन्दा बढीले एक्स्पोको अवलोकन गरेका छन् । एक्स्पोको पहिलो दिन १५ हजार, दोस्रो दिन १३ हजार ५ सय, तेस्रो दिन १९ हजार ५ सय, चौथो दिन २१ हजार ५ सय र हिजो २२ हजार जनाभन्दा बढीले अवलोकन गरेको नाइमाले जनाएको छ ।
एक्स्पोमा ५० भन्दा बढी ब्राण्डहरू सहभागी छन् । ४८ वटा स्टल रहेको एक्स्पोमा २१ वटा कार ब्राण्ड, १८ वटा दुईपांग्रे ब्राण्ड र आठवटा व्यावसायिक गाडीका ब्राण्ड सहभागी छन् ।
