कृषि विकास बैंकले गत आर्थिक वर्ष २०८१/८२ को चौथो त्रैमासको वित्तीय विवरण प्रकाशन गरेको छ। प्रकाशित विवरण अनुसार आर्थिक वर्ष २०८१/८२ मा कम्पनीले ३ अर्ब ८२ करोड ८५ लाख रुपैयाँ खुद नाफा कमाएको छ।
अघिल्लो आर्थिक वर्षको सोहि अवधिको तुलनामा कम्पनीको खुद नाफा ४८.८८ प्रतिशतले बढेको हो । अघिल्लो आर्थिक वर्षको यसै अवधिमा कम्पनीको खुद नाफा २ अर्ब ५७ करोड रुपैयाँ थियो।
समीक्षा अवधिमा कम्पनीको खुद ब्याज आम्दानी भने ६.९३ प्रतिशतले घटेर ९ अर्ब ८२ करोड १४ लाख पुगेको छ। कम्पनीको संचालन नाफा भने ४१.२९ प्रतिशतले बढेर ५ अर्ब ८४ करोड पुगेको छ ।
कम्पनीले सम्भावित जोखिमको लागि इम्पेयरमेन्ट चार्ज शिर्षक अन्तर्गत छुट्याएको रकम ९५.७० प्रतिशतले घटेर १० करोड ६२ लाख मै सिमित भएको छ। इम्पेयरमेन्ट चार्ज घटेको कारण खुद ब्याज आम्दानी घटे पनि कम्पनीको खुद नाफा बढेको देखिन्छ ।
यस अवधिमा कम्पनीको वितरणयोय मुनाफा बढेर २ अर्ब ५५ करोड २० लाख पुगेको छ । कम्पनीको वितरणयोग्य प्रति शेयर आम्दानी १८.४२ रुपैयाँ रहेको छ, यसले कम्पनीको लाभांश क्षमता १८.४२ प्रतिशत रहेको देखाउछ । यद्यपि बैंकले दिने लाभांश भने विभिन्न नियमकीय व्यवस्था र निर्दशनमा भर पर्छ। अघिल्लो आर्थिक वर्षमा कम्पनीको वितरणयोग्य मुनाफा १ अर्ब ८१ करोड १ लाख थियो ।
कम्पनीको चुक्ता पुंजी १३ अर्ब ८५ करोड रुपैयाँ रहेको छ। कम्पनीले यस अवधिसम्ममा २ खर्ब ९३ अर्ब निक्षेप संकलन गरेको छ भने २ खर्ब १३ अर्ब कर्जा लगानी गरेको छ।
समीक्षा अवधिमा कम्पनीको प्रति शेयर आम्दानी २७.६३ रुपैयाँ रहेको छ भने कम्पनीको प्रति शेयर नेटवर्थ २४१.०४ रुपैयाँ रहेको छ। कम्पनीको खराब कर्जा ३.२६ प्रतिशत रहेको छ।
