वाणिज्य, आपुर्ति तथा उपभोक्ता हित संरक्षण विभागले थप ८ वटा कन्सल्टेन्सीलाई नगद जरिवाना गरेको छ । बिहिबार गरिएको बजार अनुगमनका क्रममा कैफियत भेटिएपछि उपभोक्ता संरक्षण ऐन २०७५ अनुसार ति कन्सल्टेन्सीलाई जरिवाना गरिएको विभागले जनाएको छ ।
जस अनुसार विभागले काठमाडौँ महानगरपालिका २८ स्थिति रिड एजुकेशन हब प्रा.लि.लाई १ लाख जरिवाना तोकेको छ । काठमाडौँ २८ कै परसुट अब्रोड स्टडिजलाई पनि १ लाख नै जरिवाना तोकेको छ ।
काठमाडौँ महानगरपालिका वडा नम्बर २८ कै इनोभा एजुकेशन कन्सल्टेन्सी प्रा.लि.लाई पनि १ लाख नगद जरिवाना तोकेको विभागले भक्तपुर नगरपालिका ४ को स्याउराइ इन्टरनेशनल एजुकेशन प्रा.लि.लाई पनि १ लाख नै जरिवाना तोकेको छ ।
यस्तै, काठमाडौँ महानगरपालिका २८ को प्यासन फाउण्डेशन प्रा.लि. र सोही ठेगाना भएको काइट कन्सल्टेन्सी प्रा.लि.लाई विभागले ५१/५१ हजार जरिवाना तोकेको छ । काठमाडौँ १६ को छाङमी एजुकेशन प्रा.लि. र भक्तपुर नगरपालिका ३ को आशिर्वाद ल्याङ्वेज स्कुललाई जनही ५०÷५० हजार नगर जरिवाना तोकेको छ ।
यसैगरी, अरु थप ८ वटा कन्सल्टेन्सीलाई व्यवसायसँग सम्बन्धित कागजात लिएर विभागमा उपस्थित हुन निर्देशन पनि दिइएको विभागले जनाएको छ ।
