मानार्थ वाणिज्यदूत संघ–नेपाल (एचसीसी–एन) का निवर्तमान डीन चन्द्र प्रसाद ढकालले नेपालको आर्थिक कूटनीतिमा मानार्थ वाणिज्यदूतहरू सक्रिय एजेन्टका रूपमा कार्यरत रहेको बताएका छन् ।
एचसीसी–एनको १८औँ साधारणसभा तथा चार्टर डेको अवसरमा बोल्दै ढकालले मानार्थ वाणिज्यदूतहरू सम्बन्धित देशका लागि औपचारिक प्रतिनिधि मात्रै नभई नेपालको कूटनीति र विकासमा सक्रिय, सक्षम र प्रतिवद्ध साझेदार भएको बताएका हुन् ।
उनले आर्थिक कूटनीति आजको विश्वमा विकल्प नभई आवश्यकता बनेको उल्लेख गर्दै नेपालले अब राष्ट्रिय हितलाई ध्यानमा राखेर मानार्थ वाणिज्यदूतहरुमार्फत आर्थिक कुटनीतिलाई बढाउनुपर्ने पनि बताएका छन् । निजी क्षेत्रको छाता संस्था नेपाल उद्योग वाणिज्य महासंघका अध्यक्षसमेत रहेका ढकालले नेपालका मानार्थ वाणिज्यदूतहरूलाई “आर्थिक रूपान्तरणका लागि स्वयंसेवक दूत”को रूपमा क्रियाशील रहन आह्वान पनि गरे ।
कार्यक्रममा उनले विदेश मन्त्रालयसँगको सहकार्यमा नेपालमा पहिलोपटक आर्थिक शिखर सम्मेलन गर्ने तयारी भइरहेको जानकारी पनि दिए । साथै, चन्द्रगिरिमा परराष्ट्र मन्त्रालयसँग गरिएको कार्यशालाको स्मरण गर्दै विदेशी लगानी, नवप्रवर्तन, व्यापार, पर्यटन र डायस्पोरा संलग्नता प्रवर्द्धनमा वाणिज्यदूतहरूको योगदान महत्वपूर्ण रहने बताए।
कार्यक्रममा परराष्ट्रमन्त्री डा. आर्ज राणा देउवाले मानार्थ वाणिज्यदूतहरूले नेपाल र अन्तर्राष्ट्रिय समुदायबीचको सेतुको रूपमा काम गरिरहेको भन्दै व्यापार, पर्यटन र लगानी प्रवाहमा मानार्थ वाणिज्यदूतहरुले निर्वाह गरिरहेको भूमीकाको प्रशंसा गरिन् ।
समारोहमा ढकालले बुल्गेरियाका मानार्थ वाणिज्यदूत भोला विक्रम थापालाई डीनको जिम्मेवारी हस्तान्तरण गरेका थिए । कार्यक्रममा सरकारी अधिकारी, कूटनीतिज्ञ तथा वाणिज्यदूत समुदायका सदस्यहरूको उपस्थिति थियो ।
