नेपाल उद्योग वाणिज्य महासंघका अध्यक्ष चन्द्रप्रसाद ढकालले उद्यम व्यवसायको क्षेत्रसहित श्रम बजार पनि औपचारिक हुनुपर्ने बताएका छन् । औपचारिकीकरणको प्रगति र महत्वबारे जानकारी दिन आयोजित छलफल कार्यक्रममा अध्यक्ष ढकालले उद्यम व्यवसायको क्षेत्र औपचारिक हुनुपर्छ भन्ने कुरा केवल छलफलको विषय मात्रै नभएर आवश्यक विषय भएको बताएका हुन् ।
‘उद्योग व्यवसायको क्षेत्र अब औपचारिक हुनुपर्छ भन्ने कुरा केवल छलफलको विषय मात्रै होइन, यो आवश्यकताको विषय हो’ उनले भने, ‘सँगसँगै यी क्षेत्रमा श्रमको पनि औपचारिकीकरण हुनु आवश्यक छ । महासंघले यसका लागि एड्भोकेसी पनि गर्दै आएको छ ।’
उनले अनौपचारिक क्षेत्रलाई औपचारिक प्रणालीमा नल्याएसम्म उत्पादकत्व, रोजगारी र राजस्व नबढ्ने पनि बताए । तर, औपचारिक प्रणालीभित्रै रहेर चलिरहेका उद्यम तथा व्यवसायलाई बढी ‘रेगुलेट’ गर्न खोज्ने परिपाटीमा पनि सुधार आवश्यक रहेको अध्यक्ष ढकालको भनाइ छ ।
‘अनौपचारिक प्रणालीमा रहेर कारोबार हुँदै आएका उद्यम तथा व्यवसाय रेगुलेटमा पर्दैनन्, यीनलाई लाई फेसिलेटेड गरेर औपचारिक प्रणालीमा ल्याउनुपर्ने आवश्यकता छ’ उनले भने, ‘तर, औपचारिक प्रणालीभित्रै रहेका उद्यम व्यवसायलाई बढी रेगुलेट गर्न खोजिन्छ । यसमा पनि ध्यान दिनुपर्ने आवश्यकता छ ।’
