यो वर्षको आईपीएल २०२५ मा इतिहास रचिने भएको छ। किनकि यो वर्षको उपाधि त्यस टिमले जित्नेछ जसले हालसम्म कुनै पनि उपाधि जितेको छैन।
रोयल च्यालेन्जर्स बैंगलोर (आरसीबी) र पन्जाब किंग्स (पीबीकेएस) बीच जुन ३, २०२५ मा नरेन्द्र मोदी स्टेडियम, अहमदाबादमा फाइनल खेल हुने तय भएको छ। यी दुवै टिमले अहिलेसम्म आईपीएलको उपाधि जितेका छैनन्, र यो खेलले नयाँ च्याम्पियन पाउने छ।
आरसीबीले पहिलो क्वालिफायरमा पन्जाब किंग्सलाई ८ विकेटले हराउँदै फाइनलमा स्थान बनाएको हो, भने पन्जाब किंग्सले क्वालिफायर २ मा मुम्बई इन्डियन्सलाई पराजित गर्दै फाइनलमा प्रवेश गरेको छ। क्रिकेट प्रशंसकहरू उत्साहित छन्, किनकि यो खेलले लामो समयदेखि उपाधि जित्ने सपना बोकेका यी टिमहरूको लागि ऐतिहासिक क्षण हुनेछ।
विराट कोहली सामेल आरसीबी धेरै पटक प्ले अफमा पुगे पनि उपाधि जित्न सकेको थिएन । गत वर्षको उपाधि विजेता कप्तान श्रेयस एयरको कप्तानीमा रहेको पन्जाब किंग्स पनि उत्कृष्ट लयमा छ। श्रेयसले गत सिजन केकेआरलाई उपाधि दिलाएका थिए।
यो फाइनल खेलमा कुन टिमले इतिहास रच्नेछ भन्ने कुरा सबैको चासोको विषय बनेको छ।
