नेपाल धितोपत्र बोर्डले आईपीओमा कमिशनको विषयमा स्वतन्त्र ऊर्जा उत्पादकहरूको संस्था इप्पानको आधिकारिक धारणा माग गरेपछि इप्पानले बिहीबार त्यसको जवाफ दिने भएको छ। इप्पानले बिहीबार फेरि छलफल गरेर साझा धारणा तय गर्ने र त्यसपछि आफ्नो अधिकारिक धारणा लिखित रुपमा धितोपत्र बोर्डमा पठाउने तयारी गरेको हो।
त्यसको लागि इप्पानले बिहीबार बिहान छलफल डाकेको छ। सो छलफलपछि धितोपत्र बोर्डलाई लिखित पत्र पठाइने इप्पान स्रोतले जनाएको छ।
केही उर्जा उत्पादकहरुले आईपीओ कमिशन मागिएको विषय सार्वजनिक गरेपछि नेपाल धितोपत्र बोर्डले यसबारे स्वतन्त्र ऊर्जा उत्पादकहरूको संस्था इप्पानको आधिकारिक धारणा माग गरेको थियो। धितोपत्र बोर्डले वैशाख ३० गते इप्पानलाई पत्र लेख्दै यसबारे आधिकारिक धारणा माग गरेको थियो । धितोपत्र बोर्डका निर्देशक श्यामु मण्डलले सो पत्रमा हस्ताक्षर गरेका थिए। बोर्डको वैशाख २५ गतेको निर्णय अनुसार इप्पानलाई आधाकारिक धारणा पठाउन भनिएको थियो।
धितोपत्र बोर्डले पठाएको पत्रमा आरोपका सम्बन्धमा कुनै आधार वा तथ्यगत विवरण भएमा उपलब्ध गराउन तथा यस सम्बन्धमा संस्थाको आधिकारिक धारणा समेत उपलब्ध गराउन भनिएको थियो। नेपाल धितोपत्र बोर्डका अध्यक्षलाई जोडेर प्रकाशित धितोपत्रको प्राथमिक सार्वजनिक निष्काशन गर्न निश्चित प्रतिशत कमिशन माग्ने गरेको समेतका आरोपहरुको सम्बन्धमा बोर्डको ध्यानाकर्षण भएको पनि पत्रमा उल्लेख थियो। बोर्ड अध्यक्षको सम्बन्धमा स्वतन्त्र ऊर्जा उत्पादकहरूको संस्था, नेपाल जस्तो जिम्मेवार संस्थाका अध्यक्ष लगायत अन्य पदाधिकारीको नाम नै उद्धृत गरी यस्तो प्रकारको आरोप आएपछि इप्पानको आधिकारिक धारणा माग गरिएको धितोपत्र बोर्डले जनाएको छ ।
इप्पानले बिहीबार छलफल गरेर धितोपत्र बोर्डलाई जवाफ पठाउने भएको हो । साथै इप्पानले २२ महिनादेखि आईपीओ रोकिएको विषयमा आन्दोलन घोषणा गर्ने सम्भावना पनि रहेको इप्पानका एक पदाधिकारीले जानकारी दिएका छन् । आईपीओ अनुमतिको लागि दबाब दिनको लागि आयोजनाबाट बिजुली उत्पादन बन्द गर्नेसम्मका कार्यक्रमको तयारी इप्पानले गरेको छ। यसबारे बिहीबार छलफल हुने बताईएको छ।
यस अघि नेपाल धितोपत्र बोर्डका अध्यक्ष सन्तोष नारायण श्रेष्ठको नाम लिंदै आईपीओ स्वीकृतिको लागि कमिशन माग्ने क्रम बढेको गुनासो केही उर्जा उत्पादकले गरेका थिए। आईपीओ अनुमति रोकिएकै बेला कमिशन दिए मात्र अनुमति पाईने भन्दै विभिन्न व्यक्तिहरुले हाइड्रोका संचालकहरुलाई सम्पर्क गर्ने क्रम बढेपछि यो गम्भीर विषय भएकोले यसबारे इप्पानले यस अघि पनि छलफल नै गरेको थियो । छलफलको क्रममा केही हाइड्रोका संचालकहरुले धितोपत्र बोर्ड अध्यक्षको मान्छे भन्दै कमिशन दिए आईपीओ अनुमति दिलाईदिने भन्दै सम्पर्क गरेको घटनाबारे बताएका थिए। उनीहरुका अनुसार आईपीओ निष्काशनको लागि अनुमति दिलाईदिने भन्दै आफुलाई धितोपत्र बोर्डका अध्यक्षको मान्छे बताउने बिचौलियाले ७ प्रतिशत कमिशन मागेका थिए ।
यहि विषयमा अख्तियारले अनुसन्धान समेत गरिरहेको छ। अख्तियारले कमिशनको विषय उठान गरेका उर्जा उत्पादकहरुसँग उनीहरुले दिएको प्रमाणहरु लगेको छ। अख्तियारले नेपाल धितोपत्र बोर्डमा पनि छापा मारेर विभिन्न कागजात लागेको छ। यस विषयमा अनुसन्धान भईरहेको अख्तियारले जनाएको छ।
यस अघि : IPO अनुमति नपाएपछि ‘इन्भेष्टमेन्ट होलिडे’को छलफलमा हाइड्रो, सिमेन्ट र केबुलकार प्रबर्दक
यो पनि : आईपीओमा कमिशनको आरोप: धितोपत्र बोर्डले माग्यो इप्पानको आधिकारिक धारणा
