हुन्डाईको क्रेटा ईभी नेपाली बजारमा सार्वजनिक भएपछि अहिले देशैभरी ‘टेस्ट ड्राइभ’ चलिरहेको छ । हुन्डाईका गाडीको नेपालका लागि आधिकारिक बिक्रेता लक्ष्मी ग्रुप अन्तर्गतको लक्ष्मी इन्टरकन्टिनेन्टलले चैत ११ गते नेपालमा सार्वजनिक गरेको क्रेटा ईभीप्रति अहिले अटोमोबाइल्स पारखीहरु झुम्मिएका छन् ।
काठमाडौँ बाहेकका १० वटा ‘टच प्वाइन्ट’मा क्रेटा ईभी पुगिसकेको छ । बिर्तामोड, दमक, विराटनगर, इटहरी, हेटौँडा, चितवन, बुटवल, भैरहवा, पोखरा र धनगढीमा अहिले क्रेटा ईभीको टेस्ट ड्राइभ चलिरहेको छ । लक्ष्मी इन्टरकन्टिनेन्टलले काठमाडौँबाट भने बिक्री नै सुरु गरिसकेको छ । चैत अन्तिम साताबाट काठमाडौँ बाहेकका शहरबाट पनि क्रेटा ईभीको बिक्री सुरु हुने लक्ष्मी हुण्डाईका महाप्रबन्धक दीपक थपलिया बताउँछन् ।
‘इन्क्वायरी फ्लो पनि राम्रो छ, बुकिङ पनि भइरहेको छ, काठमाडौँबाट चाहिँ बिक्री नै सुरु भइसक्यो भन्दा पनि हुन्छ, बाहिरबाट पनि चैत अन्तिमबाट बिक्री सुरु हुन्छ’ उनले भने ।
कस्तो छ प्रतिक्रिया ?
हुन्डाईले ‘प्रोडक्ट सेल’लाई मात्रै प्राथमिकतामा नराखेको महाप्रबन्धक थपलिया बताउँछन् । उनका अनुसार लक्ष्मी ग्रुपले ‘मोबिलिटी’लाई केन्द्रमा राखेर काम गर्दै आएको छ । बुझ्न आउने उपभोक्ताहरुलाई आफूहरुले उहाँहरुको आवश्यकता अनुसारको ‘प्रोडक्ट सजेस्ट’ गर्ने उनको भनाइ छ ।
त्यस अनुसार अहिले क्रेटा ईभीमा पनि उपभोक्ताको ‘फ्लो’ निकै राम्रो पाइएको थपलिया बताउँछन् । ‘हामी बुझ्न आउनेहरु सबैलाई सुरुमा आवश्यकता के हो भनेर बुझ्छौँ, गाडी किन्नु भन्दा अगाडीको ग्राहकको एक्सपेक्टेशन र गाडी किनिसके पछिको वास्तविकता फरक हुन दिनु हुँदैन’ उनी भन्छन्, ‘अहिले पनि हामीले त्यहीँ गरिरहेका छौँ । जसअनुसार क्रेटा ईभीमा एभ्री डे (हरेक दिन) निकै राम्रो फ्लो आइरहेको छ ।’
दुइ ‘जेनेरेशन’ निर्णायक
महाप्रबन्धक थपलियाका अनुसार गाडी खरिदमा अहिले एकै परिवारको दुइ ‘जेनेरेशन’ निर्णायक देखिएको छ । पहिलो पुस्ताः १९८० यताको पुस्ता । जो, अहिले ४५ वर्ष हाराहारी पुगेको छ । दोस्रो पुस्ताः योङ्गर पुस्ता छ ।
पहिलो पुस्ता ‘ब्राण्ड’प्रति बढी भरोसा गर्छ । थपलियाका अनुसार प्रोडक्टसँगै ब्राण्डमा विश्वास गर्ने भएकाले अझै पनि यो पुस्ता गाडी खरिदमा निर्णायक छ । जसले १०/१५ वर्षदेखि गाडी चढिरहेको छ ।
टेक्नोलोजी र डिजाइनलाई हेर्ने नयाँ जेनेरेशन पनि अटोमोबाइल्सको ‘चुज’मा निर्णायक भइरहेको छ । यो जेनेरेशनले सुरुमा गाडीको ‘ग्ल्यामर लुक्स’ मन पराउने भएपनि अन्ततः ब्राण्डकै विश्वासमा फर्किने गरेको थपलियाको अनुभव छ ।
‘गाडी भनेको पार्टनर हो, गाडी किन्ने विषयमा परिवारभित्र निकै छलफल हुन्छ, आफन्तसँग छलफल हुन्छ, साथिभाइसँग सरसल्लाह हुन्छ’ जीएम थपलिया भन्छन्, ‘अल्टिमेट च्वाईस उपभोक्ताकै हुने भएपनि उसले एक्लै डिशिजन गर्दैन, ब्राण्डको इतिहास हेर्छ हेर्छ । ब्राण्डको विश्वसनीयता भनेको उसले सुरुमा गरेको ‘प्रमिश’ पूरा गरेको छ कि छैन भन्ने हो, हाम्रो हकमा क्रेटा आफैँमा ‘प्रमिश’ हो ।’
क्रेटा ईभीका पार्टसको मूल्य नै सार्वजनिक
अहिले उपभोक्ताहरुमा एउटा डर भनेको ईभीका पार्टस् सहजै पाइन्छन् कि पाइँदैनन् भन्ने पनि छ । सँगै, ईभीका पार्टस् निकै महँगा हुन्छन् भन्ने पनि चर्चा भइरहन्छ । गाडी बिक्रेताहरुले सुरुमा स्पेयर पार्टस्को मूल्य सार्वजनिक नगर्दा पनि ग्राहकमा यस्तो चिन्ता पर्नु स्वभाविक हो ।
तर, लक्ष्मी हुन्डाईले भने स्पेयर पार्टस् ल्याएर तिनको मूल्य समेत सार्वजनिक गरेको छ । ब्याट्रीबाहेक सबै पार्टस्–पूर्जाको मूल्य सार्वजनिक गरिएको महाप्रबन्धक थपलियाको भनाइ छ । यसले गर्दा ग्राहकहरुलाई आफ्नो गाडीको कुन पार्टस्को मूल्य कति पर्छ भन्ने पहिल्यै जानकारी हुन्छ । जसका कारण पछि गाडी मर्मत गर्नुपर्दा अस्वभाविक लागत देखिने अवस्था नआउने उनको विश्वास छ ।
