किशु झा
मैले झण्डै ६ वर्षदेखि मेरो इलेक्ट्रिक गाडी (EV) चलाइरहेको छु, र म MG ब्रान्डको पहिलो ग्राहक पनि हुँ । मैले गाडी किन्ने बेलासँगै Electric Vehicle Group Nepal पनि बनाएको थिएँ, जुन अहिले EV प्रेमीहरूको ठूलो समुदाय बनिसकेको छ । EV को यात्रा साँच्चै उत्कृष्ट रहेको छ !
अहिले चार्जिङ नेटवर्क धेरै बढ्दै गएको छ, जसले गर्दा आजका EV मालिकहरूलाई पहिलाको जस्तो डर गर्नुपर्ने अवस्थै छैन । मेरो गाडीको ब्याट्री ६ वर्षमा मात्र ५% जति कम भएको छ, र अहिलेसम्म ब्रेक सु बदल्नै परेको छैन—रेजेनेरेटिभ ब्रेकिङकै कारण ! पेट्रोल/डिजेलको बचत मात्र सोच्दा पनि EV ले निकै पैसा बचत गरिदिन्छ ।
साधारण खर्च घट्नुका साथै, EV चलाउँदा यात्रा धेरै शान्त, आरामदायी र तनावमुक्त हुन्छ । इन्जिनको आवाज हुँदैन, तुरुन्तै पावर आउँछ, र मर्मत खर्च पनि निकै कम हुन्छ । साथै, धुवाँरहित सफा वातावरण बनाउन सघाउनु झन् सन्तोषजनक लाग्छ ।
EV को आलोचना गर्नेहरूलाई म भन्न चाहन्छु—“ब्याट्री टिक्दैन,” “चार्ज गर्न गाह्रो छ,” “EV त फेशन मात्र हो” भन्ने कुरा धेरै सुनियो । तर, ६ वर्ष बितिसक्दा मेरो ब्याट्री अझै राम्रो छ, चार्जिङ कहिल्यै समस्या बनेको छैन, र विश्वभर EV को माग बढ्दो छ । EV को भविष्य निश्चित छ !
केही मान्छेहरू सधैं परिवर्तनसँग डराउँछन् र नयाँ कुराबाट टाढै बस्न खोज्छन् । तर उनीहरूले बुझ्नुपर्छ—यो दुनियाँमा स्थायी कुरा भनेकै परिवर्तन हो । प्रविधि अगाडि बढ्छ, र हामीले त्यसलाई स्वीकार्नुपर्छ ।
ब्याट्रीको रेन्ज समयसँगै अलि घट्न सक्छ, तर चार्जिङ स्टेसनहरू दिनदिनै थपिइरहेकाले अब त्यो डर गर्नुपर्ने विषय होइन । चार्जिङ नेटवर्क यति छिटो बढ्दैछ कि अब पेट्रोल पम्प भेटिए जस्तै सजिलै चार्जिङ स्टेशन पाउन सकिन्छ !
अहिलेको प्रविधि झन् उत्कृष्ट भएकोले EV लिने सोचमा हुनुहुन्छ भने ढुक्क भएर रोज्न सक्नुहुन्छ । अब EV मा जान सबैभन्दा सही समय यही हो !
