नाडा अटोमोबाइल्स एसोसियशन अफ नेपालले विद्युतीय गाडीको ऋण मूल्य अनुपातको सीमालाई ६० प्रतिशत गरिएको असन्तुष्टि जनाएको छ । नेपाल राष्ट्र बैंङ्कले आर्थिक वर्ष २०८१/८२ को मौद्रिक नीतिको अर्धवार्षिक समिक्षामार्फत ईभीको लोन टू भ्यालू रेसियो ८० प्रतिशतबाट ६० प्रतिशतमा झारेपछि नाडाले असन्तुष्टि जनाएको हो ।
मौद्रिक नीतिको समीक्षाबारे आफ्नो धारणा सार्वजनिक गर्दै नाडाले विद्युतीय सवारी साधनको बिक्रीमा लोन टू भ्यालू रेसियो ६० प्रतिशतमा खुम्च्याइँदा ईभीको व्यवसायमा लागेका व्यवसायीहरुलाई भने ठूलो मर्का पर्ने अवस्था सिर्जना भएको जनाएको हो ।
‘नेपाल राष्ट्र बैंकको यस नीतिबाट विद्युतिय सवारी साधनहरुको प्रयोगमा निश्चित रुपमा कमी आउने अवस्था आएको छ’ नाडाले भनेको छ, ‘विद्युतीय सवारी साधनहरुको हकमा व्यवसायीहरुको लगानीलाई सुरक्षित बनाउनका लागि यसअघि कै नीति अर्थात ऋण मूल्य अनुपातको सीमालाई ८० प्रतिशत नै कायम गर्ने व्यवस्थाका लागि अनुरोध गर्दछौँ ।’
नाडाले पेट्रोल र डिजेलबाट चल्ने सवारी साधनहरुको ऋण मूल्य अनुपातको सीमालाई ५० प्रतिशतबाट ६० प्रतिशत कायम गरिनु भने सह्रानीय नै भएको समेत जनाएको छ ।
