सुस्ताएको अटोमोबाइल्स बजार अहिले ईभीमय हुँदा गुल्जार देखिँदैछ । आयातको आँकडा हेर्दा निजी कारमा ईभीको हिस्सा ७० प्रतिशत नाघेको छ भने कमर्सियल सेग्मेन्टमा पनि ईभीको उपस्थिति बढ्दो छ । त्यसो त, अहिले खासगरि मूल्यका हिसाबले ५० लाखदेखि ६५ लाख भित्रको ब्राकेटमा आउने ईभीबीच चर्को प्रतिस्पर्धा छ ।
अब फेरि एक समय नेपाली बजारमा सर्वाधिक सफल मानिएका अटो ब्राण्डहरुबीच प्रतिस्पर्धा हुने भएको छ । टाटा, हुण्डाई र एमजीका नयाँ गाडीहरुबीच अब प्रतिस्पर्धा चुलिने देखिएको छ । सबैका आ–आफ्नै विशेषता छन्, जसले ग्राहक तान्न ति विशेषताहरुको प्रचार गरिरहेका छन् ।
टाटा: कर्भ
टाटाको कर्भ ईभी हालै सार्वजनिक भइसकेको छ । टाटा मोटर्सको नोपालका लागि आधिकारिक बिक्रेता सिप्रदी ट्रेडिङले नेपालमा टाटा कर्भ ईभी सार्वजनिक गरेको छ ।
आफ्नो पहिलो कूपे एसयूभीका रुपमा कर्भ ईभी सार्वजनिक गरेको सिप्रदीले हाल नेपालमा यसको टप भेरियन्ट मात्रै बिक्री हुने जनाएको छ । यस गाडीको मूल्य ५६ लाख ९९ हजार तोकिएको छ ।
कम्पनीका अनुसार यस गाडीमा अटोमेटिक इमर्जेन्सी ब्रेकिङ सिस्टम छ । जसले गाडीलाई सवारीसाधन, पैदलयात्रीमा ठोकिँन दिँदैन । गाडीलाई सुरक्षित राख्नको लागि स्वचालित ब्रेकले काम गर्ने बताईएको छ ।
ग्राउण्ड क्लियरेन्स १८६ एमएम रहेको यो कारले सेफ्टी रेटिङ फाइभ स्टार पाएको छ । ईभीको इन्टेरियर ह्वाइट र ग्रे गरी दुई कलरमा बनाइएको छ । गाडीमा ५५ किलोवाट आवरको ब्याट्री प्याक छ ।
एमजी: एस–५
पारामाउण्ट मोटर्सले एमजी एस–५ नेपाल ल्याउँदैछ । मार्च लाग्नासाथ एस–५ को औपचारिक लन्च गर्ने तयारीमा कम्पनी छ । ‘प्योर इलेक्ट्रिक प्लेटफर्म’मा निर्माण भएको र नेपाली बजारले पर्खिरहेको ‘एस–५’लाई लिएर कम्पनी निकै आशावादी पनि देखिएको छ ।
४९ किलोवाटका २ वटा र ६२ किलोवाटको एउटा भेरियन्टमा आउने यो गाडी ‘रियर ह्वील ड्राइभ’मा आउँदैछ । ४९ किलोवाटका २ भेरियन्टमध्ये एउटाको बिक्री मूल्य ५० लाखभन्दा तल र अर्कोको बिक्री मूल्य ५५ लाखभन्दा तल हुने देखिएको छ । ६२ किलोवाटमा उपलब्ध हुने गाडीको बिक्री मूल्य चाहिँ ६० लाखभन्दा केही तल हुन्छ भन्ने देखिएको छ ।
यसको २ भेरियन्टमा १७ र १८ इन्चको टायर छ । १७ इन्चको टायरमा १७५ एमएम ग्राउण्ड क्लियरेन्स छ भने १८ इन्चको टायरमा १८० एमएम ग्राउण्ड क्लियरेन्स छ ।
अर्को गजबको कुरा के छ भने, गाडीको ब्याट्री बिग्रिएर फेर्नुपर्ने अवस्था आएमा पूरानो ब्याट्री भारतको ‘लोहाम’ कम्पनीले लैजाने गरि पारामाउण्टले सम्झौता गरिसकेको छ । ब्याट्रीको ‘हेल्थ एण्ड कण्डिशन’ हेरेर गाडीधनीले केही मात्रामा पैसा पनि पाउँछन् । यसकारण ब्याट्री बिग्रिएमा के गर्ने भन्ने चिन्ता पनि हटेको छ । साथै, ब्याट्रीको वारेन्टी ८ वर्षको छ ।
साथै, गाडी चलाइरहँदा कारणबस चालक निदायो वा थाक्यो भने सेन्सरले सेन्स गरेर ‘आर्लाम’ लगाइदिन्छ । यसले गाडीलाई थप सुरक्षित बनाएको छ ।
हुण्डाई: क्रेटा
हुण्डाईका गाडीको नेपालका लागि आधिकारिक बिक्रेता लक्ष्मी ग्रुप अन्तर्गतको लक्ष्मी इन्टरकन्टिनेन्टलले ‘क्रेटा ईभी’ नेपाल ल्याउँदैछ । यो निकै प्रतिक्षा गरिएको गाडी अन्तर्गत पर्छ । क्रेटा ईभी २ वटा ब्याट्री प्याकमा उपलब्ध हुँदैछ ।
क्रेटा ईभीमा २ सय एमएमको ग्राउन्ड क्लियरेन्स हुन्छ । यसको अर्थ यो ईभी नेपालको जस्तोसुकै बाटोमा पनि जान सक्ने कम्पनीको दाबी छ । यसमा ब्रेक ओभर एङ्गल १७ डिग्रीभन्दा माथि छ । जसका कारण ब्याट्री थप सुरक्षित छ ।
यसमा ४२ किलोवाट आवर क्षमताको ब्याट्री हुन्छ । कम्पनीका अनुसार नेपालको बाटोमा यसले थोरैमा पनि ३२० किलोमिटर भन्दा माथिको रेन्ज दिने देखिएको छ । अर्को कुरा, गाडीमै फुल साइजको स्पेयर टायर पनि दिइएको छ । पन्चर भइहाल्यो भने पनि समस्या भएन ।
भारतमा १७ लाख ९९ हजार भारुबाट यसको मूल्य सुरु छ, नेपाली बजारमा पनि ५५ लाख आसपास नै यसको बिक्री मूल्य कायम हुने देखिन्छ ।
हुण्डाईले पनि यदि ब्याट्री फेर्नुपर्ने अवस्थामा गाडीधनीले पूरानो ब्याट्रीको थोरै भएपनि मूल्य पाउन सकुन् भनेर भारतीय कम्पनीसँग सहकार्य गर्दैछ ।
क्रेटा र एस–५ मार्च लाग्नासाथ लन्च हुँदैछन् । त्यतिबेलासम्म टाटाको कर्भले धमाधम बुकिङ लिइरहेको हुनेछ । यस आधारमा मार्च–अप्रिल महिनामा नेपाली बजारमा ईभीका ३ ब्राण्डबीच भव्य प्रतिस्पर्धा देख्न पाइने भएको छ ।
