नेपालको आफ्नै मोबाइल फोन ब्राण्ड उत्पादन गर्न लागेको एयर मोबाइलले देशब्यापी रुपमा डिलरको खोजी तीव्र पारेको छ । कम्पनीले अहिले डिलर आवश्यकता सम्बन्धि सूचना प्रकाशित गरेरै डिलर बन्न इच्छुकलाई आह्वान गरिरहेको छ ।
कम्पनीका अध्यक्ष तथा प्रबन्ध निर्देशक आनन्द शर्माले नेपाल र भारतीय बजारमा डिलर बन्न इच्छुक कम्पनी तथा फर्महरुलाई सूचनामार्फत आह्वान गरिएको जानकारी दिएका छन् ।
अहिले एयर मोबाइलले मोबाइल एसेसिरिज बनाइरहेको छ । कम्पनीले अहिले डाटा केवल, स्मार्ट वाच, पावर बैंक, चार्जर, हेड फोन, एयरपड, नेकब्याण्ड, एयर फोन, ब्लुतुथ स्पिकर, एडप्टर, अक्स केवल र मोबाइल स्ट्याण्ड उत्पादन गर्दै आएको छ ।
कम्पनीका प्रबन्ध निर्देशक शर्माका अनुसार एयर मोबाइलले आफ्ना मोबाइल एसेसिरिजमा ६ महिनाको वारेन्टी दिँदै आएको छ । एयर मोबाइलको नाममा मोबाइल पनि आउने बताइएको छ ।
यसैगरी, कम्पनीले अबको केही महिनामै स्मार्ट फोन ब्राण्डसमेत लन्च गर्ने तयारी तीव्र पारेको छ । बाराको कलैयामा प्लान्ट राखेर मोबाइल फोन उत्पादनको काम अघि बढेको र आगामी आर्थिक वर्षको सुरुवातबाटै मोबाइल लन्च हुने कम्पनीले जनाएको छ ।
अहिले नेपालका पूर्वदेखि पश्चिमबाट र भारतीय बजारबाट समेत डिलर बन्न इच्छुक कम्पनी, फर्म तथा पसलहरुले चासो देखाइरहेको र डिलर नियुक्तिको क्रम पनि सुरु भइसकेको कम्पनीले जनाएको छ ।
