आज नेप्से परिसूचक २३.८२ अंकले घटेर २ हजार ८९.४२ विन्दुमा बन्द भएको छ ।
यो दिन राम्रा र बलिया कम्पनीहरु मापक सेन्सेटिभ इन्डेक्स पनि ४. ८२ अंकले घटेर ३७४.०९ अंकमा पुगेको छ ।यस दिन ५६ कम्पनीको मात्रै शेयरमूल्य बढेको छ भने १९१ वटा कम्पनीको शेयरमूल्य घटेको छ।
यो दिन नेप्से घटेको भएपनि कारोबार भने बढेको छ । अघिल्लो कारोबार दिन ३ अर्ब ८९ करोडको शेयर खरिदबिक्री भएको थियो ।
यो दिन नेप्सेमा सूचीकृत कम्पनीहरु मध्ये ३१४ वटा कम्पनीको १ करोड ७ लाख ३८ हजार १६९ कित्ता शेयरको ४ अर्ब ५७ करोड रुपैयाँभन्दा बढीमा खरिदबिक्री भएको छ ।
आजको बजार घटाइले आगामी बजेटप्रति नकारात्मक प्रतिक्रिया दिएको जस्तो देखिएको छ । बजेटमा लगानीकर्ताका माग सम्बोधन नभएकाले बजारले नकारात्मक प्रतिक्रिया दिएको लगानीकर्ताले बताएका छन् ।
लगानीकर्ताहरुले बजेटमा कर सम्बन्धि नयाँ व्यवस्था हुने अपेक्षा गरेका थिए। सोही अपेक्षामा बजेट अघिका दिनहरुमा बजार बढेको थियो। तर, त्यस्तो केहि भएन । जसका कारण बजार घटेर २ हजार १०० विन्दुभन्दा तल झरेको हो।
यो दिन चार वटा अलग- अलग कम्पनीको शेयरमूल्यमा सकारात्मक सर्किट लेभलमा कारोबार भएको छ। जसअनुसार युनिलिभर नेपाल, कालिञ्चोक दर्शन, अप्पर लोहोरे खोला हाइड्रोपावर र भगवती हाइड्रोपावरको शेयरमूल्यमा सकारात्मक सर्किट लागेको छ ।
यसैगरी, यो दिन पोखरा फाइनान्सको शेयरमूल्य ८.१७ प्रतिशतले बढेको छ। त्यस्तै बुद्धभुमि नेपाल हाइड्रोपावर कम्पनीको शेयरमूल्य सर्वाधिक ९.४१ प्रतिशतले घटेको छ।
त्यस्तै यो दिन विकास बैंक १.११, हाइड्रोपावर ०.११, लगानी ०.८३, जीवन बीमा १.३०, लघुवित्त १.७१, निर्जीवन बीमा ०.९६ र अन्य समूह ०.७० प्रतिशतले घटेको छ ।
