सरकारले लगानी बोर्डको प्रमुख कार्यकारी अधिकृत पदका लागि दरखास्त आह्वान गरेको छ । प्रधानमन्त्री तथा मन्त्रिपरिषद्को कार्यालय अन्तर्गत रहेको लगानी बोर्डको प्रमुख कार्यकारी अधिकृत सिफारिस समितिको सचिवालयले दरखास्त आह्वान गरेको हो।
यसअघिका कार्यकारी प्रमुख सुशील भट्टको कार्यकाल सकिएसँगै सरकारले आवेदन माग गरेको हो । सार्वजनिक-निजी साझेदारी तथा लगानी ऐन, २०७५ को दफा १२ को उपदफा (५) बमोजिम दरखास्त आह्वान गरिएको हो ।
निवेदन दिने अन्तिम मितिसम्ममा पैंतीस वर्ष उमेर पूरा भएको र पैसठ्ठी वर्ष ननाघेका नेपाली नागरिकले आवेदन दिन सक्ने छन्। आवेदन दिनको लागि मान्यता प्राप्त शिक्षण संस्थाबाट अर्थशास्त्र, व्यवस्थापन, वाणिज्यशास्त्र, कानून, इन्जिनियरिङ्ग वा विकास सम्बन्धी विषयमा कम्तीमा स्नातकोत्तर तह उत्तीर्ण गरेको र परियोजना विकास, सार्वजनिक खरिद, सार्वजनिक-निजी साझेदारी, लगानी प्रवर्द्धन, विकास प्रशासन, बैंकिङ्ग, वित्तीय क्षेत्र वा औद्यौगिक व्यवस्थापनको क्षेत्रमा कम्तीमा दश वर्षको व्यवस्थापकीय अनुभव हासिल गरेको हुनु पर्ने छ।
साथै विदेशी राष्ट्रको स्थायी आवासीय अनुमतिपत्र नलिएको र ऐनको दफा १२ को उपदफा (४) बमोजिम तथा अन्य प्रचलित कानूनले अयोग्य नभएको व्यहोरा लगानी बोर्डको प्रमुख कार्यकारी अधिकृतको नियुक्तिका लागि सिफारिस सम्बन्धी कार्यविधि, २०८१ को अनुसूची २ बमोजिम स्व-घोषणा पेश गर्नु पर्ने छ।
आवेदन दिंदा नेपाली नागरिकताको प्रमाणपत्रको प्रतिलिपि, योग्यता, अनुभव र सम्पर्क ठेगाना खुल्ने व्यक्तिगत विवरण (Bio-Data), शैक्षिक योग्यताका प्रमाण पत्रको प्रतिलिपि (विदेशी शैक्षिक संस्थाबाट प्राप्त शैक्षिक उपाधि भएमा समकक्षताको प्रमाणपत्र पेश गर्नुपर्नेछ) , तथा अनुभव खुल्ने प्रमाणको प्रतिलिपि पेश गर्नु पर्ने छ।
नेपालमा लगानीको अवस्था र सम्भाव्यताको विश्लेषण सहित विद्यमान कार्यसम्पादनको अवस्था, लगानी बोर्डको सबल एवम् दुर्बल पक्ष तथा अवसर र चुनौतिको विश्लेषण (SWOT Analysis ), र भावी रणनीतिक योजना विषयहरुमा बढीमा पाँच हजार शब्दसम्मको नेपाली भाषामा तयार गरिएको रणनीति र कार्ययोजना पेश गर्नु पर्ने छ ।
