जेन् जी शहीद परिवारको संस्था ‘जेन् जी शहीद परिवार कल्याणकारी समाज’ले गोल्यान ग्रुपका अध्यक्ष तथा प्रबन्ध निर्देशक अक्षय गोल्यानलाई सम्मान गरेको छ । जेन् जी आन्दोलनको एक वर्ष पूरा भएको अवसरमा मंगलबार काठमाडौंमा आयोजित विशेष समारोहमा गोल्यानलाई सम्मान गरिएको हो ।
गृहमन्त्री सुधन गुरुङसहित सहभागी कार्यक्रममा समाजले गोल्यानलाई सम्मानपत्रसहित खादा ओढाएर सम्मान गरेको हो । अक्षय नेतृत्वको गोल्यान ग्रुपले गोल्यान फाउण्डेशनमार्फत जेन् जी आन्दोलनमा शहीद भएकाहरुका सन्तानलाई १२ कक्षासम्मको शैक्षिकवृत्ति र बुबा आमालाई आजीवन स्वास्थ्य बीमा प्रदान गरेको छ । आन्दोलनको एक महिनापछि २०८२ असोज २४ मा गोल्यान ग्रुपले शिक्षा र स्वास्थ्यमा आधारित सहयोग कार्यक्रम घोषणा गरेको थियो ।
प्रतिवद्धताअनुसार फाउण्डेशनमार्फत २२ जना शहीदका ३१ बालबालिकालाई शैक्षिकवृत्ति र २२ शहीदका ४३ आमा–बुवालाई वार्षिक १० लाख रुपैयाँको स्वास्थ्य बीमा प्रदान गरिएको छ । शैक्षिकवृत्ति कक्षा १२ सम्म र स्वास्थ्यबीमा आजीवन रहेको छ । फाउण्डेशनले शैक्षिकवृत्ति र स्वास्थ्य बीमा कार्यक्रमको लागि वार्षिक करिब साढे २ करोड रुपैयाँ विनियोजन गर्दै आएको छ ।
कार्यक्रममा मन्तव्य राख्दै अध्यक्ष तथा प्रबन्ध निर्देशक गोल्यानले शहीद परिवारमा समर्पित शिक्षा र स्वास्थ्यको बचन कुनै एक वर्ष वा कार्यक्रमको लागि नभई सधैंको लागि भएको बताए । ‘यो बचन आज गरेर भोलि बिर्सिने बचन होइन,’ उनले भने, ‘शहीदहरुको सम्मानमा उहाँहरुको सन्तान र बुवाआमाको सुरक्षित भविष्यको लागि निरन्तर रहन्छ ।’
जेन् जी आन्दोलनपछि शहीद परिवार र सन्तानहरु अध्ययन गर्ने विद्यालयको भ्रमणपछि शहीद परिवारको सुरक्षित भविष्यको लागि आफूलाई कर्तव्यबोध भएको उनले बताए ।
अध्यक्ष गोल्यानले शहीदहरुले देखेको सुरक्षित, प्रगतिशील, शान्त र न्यायपूर्ण नेपाल निर्माणको सपना सबै मिलेर पूरा गर्नुपर्ने बताए । ‘हामीले शहीदहरुको बलिदानलाई बिर्सेका छैनौं, देश बनाउने हरेक नेपालीको कर्तव्य हो,’ उनले भने, ‘शहीदहरुले आफ्नो कर्तव्य पूरा गर्नुभयो, अब पालो हाम्रो हो ।’
