आन्तरिक राजस्व विभागले गत आर्थिक वर्ष २०८०/०८१ मा २ हजार ३ सय व्यापारिक फर्मबाट कर छली भएको निष्कर्ष निकाल्दै अनुसन्धान सुरु गर्न लागेको छ । विभागले झुटा तथा नक्कली बीजकको प्रयोग गरी कर छली भएको निष्कर्ष निकाल्दै २ हजार ३ सय व्यापारिक फर्म तथा करदातामाथि अनुसन्धान सुरु गर्न लागेको हो ।
विभागका अनुसार ठूला करदाता कार्यालय, मध्यमस्तरीय करदाता कार्यालय र ४३ वटा आन्तरिक राजस्व कार्यालयबाट गरिएको अध्ययनले २ हजार ३ सय फर्मले कर छली गरेको देखिएको छ । कर छली गरेको आशंकामा परेका फर्महरुको विवरण मातहतका कार्यालयहरुमा पठाइसकिएको छ । त्यस्ता २ हजार ३ सय फर्मबाट २३ अर्ब कर छली भएको अनुमान विभागको छ ।
विभागले आर्थिक वर्ष २०७९/०८० मा पनि कर छली गर्ने १ हजार ९८६ फर्ममाथि अनुसन्धान गरेर ११ अर्ब ३ करोड १७ लाख कर निर्धारण गरिसकेको छ । यसरी निर्धारण भएको करमध्ये हालसम्म ३१ करोड रुपैयाँ अशुल भइसकेको विभाग स्रोतले बताएको छ । बाँकी कर अशुलीको प्रक्रिया जारी छ ।
यसलगत्तै विभागले गत आर्थिक वर्षमा भएको कारोबार र कारोबारमा संलग्न व्यापारिक फर्ममाथि सुक्ष्म निगरानी गर्दै २ हजार ३ सय फर्महरुमाथि छानबिन गर्नुपर्ने निष्कर्ष निकाल्दै अनुसन्धान प्रक्रिया अघि बढाएको हो ।
